Servicios científico técnicos SCTs

Los Servicios Científico-Téunicos (SCT) son un conxuntu d'unidaes que sofiten a investigadores, grupos o equipos de la Universidá, lo mesmo que d'otres entidaes públiques o privaes. Cunta con dieciocho unidaes que s'encartiyen en tres categoríes de serviciu:

Téuniques d'análisis: resonancia magnética nuclear, microscopía electrónica, difraición de rayos X, midíes magnétiques, espectrometría de mases, ensayos térmicos y análisis elemental, fluorescencia de rayos X y microsonda electrónica; y espectrometría fotoelectrónica, UV-visible ya IR.

Llaboratorios d'ensayos: ensayos bioteunolóxicos y biomédicos, muestréu oceanográficu, bioteriu y ensayos preclínicos, nanoteunoloxía (inclúi membranes nanoporoses), teunoloxía alimentaria y ensayos medioambientales.

Sofitu teunolóxicu: microscopía fotónica y procesu d'imáxenes, clúster de modelización científica, taller mecánicu y consultoría estadística.

Toes elles tán xestionaes por una unidá alministrativa. Les sos instalaciones asítiense les más d'elles nel Edificiu Severo Ochoa del Campus d'El Cristo, n'Uviéu. Nesi mesmu campus allúgase La Unidá de Bioteriu y Ensayos Preclínicos que, poles sos carauterístiques, cunta con un edificiu propiu.

Hai, arriendes d'ello, tres unidaes de los Servicios Científico-Téunicos nel Campus de Mieres y otra nel Campus de Xixón, nos que ta prevista, nun futuru, l'asitiamientu de nueves unidaes.