La investigación na Universidá d’Uviéu

La Universidá d'Uviéu foi una de les primeres nueve universidaes españoles en llograr el cuñu de Campus d'Escelencia Internacional y fíxolo con un proyeutu nel que la investigación d'escelencia, la especialización y la tresferencia de conocimientu al texíu productivo son dalgunos de los sos principales activos, xunto a la docencia d'escelencia, xunto a la internacionalización y xunto a un nuevu modelu de campus más averáu al rodiu social.

La Universidá d'Uviéu cunta con una plantiya de personal docente ya investigador (PDI) de más de 2.000 persones distribuyíes en 38 departamentos que, pa desendolcar la so xera investigadora, axúntense en grupos d'investigación. Penriba de los grupos d'investigación, hai tamién centros ya institutos d'investigación y, arriendes d'ello, la institución académica asturiana participa en centros de referencia y redes nacionales ya internacionales.

La universidá acueye a un coleutivu d'investigadores mozos constituyíu por unes 350 persones, que s'inxerten nos grupos d'investigación pente medies d'estremaes convocatories y programes d'ayuda a la formación n'investigación y docencia, tanto predoctorales, como posdoctorales. Hai, otra miente, unes 400 persones que faen llabores d'investigación dientro de proyeutos o contratos d'investigación financiaos con fondos públicos o privaos.

Los ingresos globales llograos pola Universidá d'Uviéu pa investigación en 2011 foron de 37,5 millones d'euros. Consiguiéronse 70 nuevos proyeutos nel Plan Nacional d'I+D, 13 proyeutos del Plan de Ciencia, Teunoloxía y Anovación d'Asturies (PCTA), 5 nuevos proyeutos europeos del Sétimu Programa Marcu (7PM) y más de 460 proyeutos d'investigación, contratos y convenios de collaboración con empreses.

Desendolca'l 80% de la I+D+i d'Asturies y los ingresos remanecíos de la so producción científica algamen unos 40 millones d'euros añales, con al rodiu de 500 contratos o alcuerdos con empreses pa desendolcar proyeutos d'investigación."

Les llinies de la política d'investigación defínense dende'l Vicerrectoráu d'Investigación y Campus d'Escelencia Internacional, que s'encarga d'encadarmar los medios personales y materiales que faciliten l'algame de los llogros en materia d'investigación, desendolcu y anovamientu.

La xestión de la investigación faise col sofitu del Serviciu d'Investigación, pa proyeutos de la comunidá, estatales y en collaboración con empreses y entidaes públiques y privaes. La Oficina de Proyeutos Europeos encárgase de los proyeutos internacionales y la Oficina de Tresferencia de Resultaos de Investigación (OTRI) faise cargu de la tresferencia de conocimientu a la empresa.

La Universidá d'Uviéu cunta tamién cola collaboración de la Fundación Universidá d'Uviéu que tien un enclín hacia la investigación en collaboración cola empresa y el sofitu a los investigadores n'otres aiciones complementaries a la investigación, como l'entamar congresos o aconceyamientos científicos.

El Clúster de Biomedicina y Salú y el Clúster d'Enerxía, Mediu ambiente y Cambéu Climáticu axunten, nes sos estayes de conocimientu respeutives, les llinies d'especialización prioritaries de la Universidá d'Uviéu en materia d'investigación. Constituyéronse per aciu del proyeutu Ad Futurum, dientro del cuñu de Campus d'Escelencia Internacional (CEI), col envís de potenciar la investigación d'escelencia empobinada al desendolcu teunolóxicu y l'anovamientu en sectores estratéxicos pa la comunidá.

La institución tien puestes yá les sos mires nel programa Horizon 2020, el programa marco de financiamientu de la investigación y l'innovación que va entrar a valir pal periodu 2014-2020 na Xunión Europea.