Tresferencia de resultaos a la empresa OTRI

La Universidá favorez y afala la tresmisión del conocimientu na so rellación cola industria, los entamadores y los inversores, col envís de contribuyir al sistema nacional d’anovamientu y desendolcu teunolóxicu.

Ente otres iniciatives, la Universidá d'Uviéu sofita la creación d'empreses remanecíes del conocimientu xeneráu na propia Institución (spin-offs) y trata de favorecese que tanto instituciones públiques como empreses puean beneficiase de los avances venceyaos cola I+D+i. La Oficina de Tresferencia de Resultaos de la Investigación (OTRI) encárgase de sofitar y coordinar estes funciones.

La Universidá d'Uviéu pon al algame del sector empresarial el conocimientu xeneráu polos investigadores. Nesti sen, la Oficina de Tresferencia de Resultaos de la Investigación (OTRI) actúa como interllocutor en temes de negociación de llicencies d'esplotación de patentes, modelos d'utilidá y software. Cada contratu de llicencia de teunoloxía o d'usu d'un programa informáticu negóciase individualmente, darréu qu'inflúin dellos factores y hai necesidaes particulares per parte de cada empresa.

La Universidá d'Uviéu tien un pebidal d'empreses y participa xunto al restu d'universidaes del G-9 na empresa UNIVALUE

Del memu mou la Universidá d'Uviéu cunta con un pebidal d'empreses asitiáu nel Edificiu Severo Ochoa del Campus d'El Cristo, n'Uviéu, qu'acueye spin-offs universitaries y empreses de nueva creación participaes o encontaes pola Universidá y facilita espacios pal allugamientu d'empreses de base teunolóxica nun rodiu favoratible pal so desendolcu.

La Universidá d'Uviéu, xunto col restu d'universidaes del G9, iguó la empresa UNIVALUE. Esta entidá xurde col envís de da-y valir, promocionar y comercializar los resultaos vinientes de la investigación universitaria. Amás aconseya a les universidaes na identificación de mercaos a los qu'empobinar el conocimientu xeneráu polos investigadores.