Contratación d’investigación ente Universidá y empresa

Pa la Universidá d’Uviéu ye prioritaria la identificación de llinies d’investigación que puean tener un interés d’aplicación a la empresa y a la sociedá en xeneral. La collaboración ente Universidá y Empresa en materia d’investigación y anovamientu xenera una serie d’oportunidaes y beneficios mutuos.

Accesu a fontes de financiamientu pa participación conxunta en proyeutos d'I+D

La collaboración ente grupos d'investigación y empreses pue permitir a entrambos participar en convocatories específiques de les alministraciones públiques pa proyeutos d'I+D. Los investigadores benefíciense d'un financiamientu adicional per aciu de contratos d'I+D coles empreses, y éstes llogren ayudes que subvencionen una parte de les sos xeres d'I+D.

Impulsu a la investigación aplicada y al desendolcu teunolóxicu

La collaboración con empreses permite participar el desendolcu de los resultaos d'investigación hasta la so aplicación final nel sector industrial. Esti llabor conxuntu y coordináu abre la posibilidá, a los grupos d'investigación de facer una investigación aplicada más próxima al anovamientu, al trabayar na igua de problemes reales;y a les empreses ufiérta-yos la posibilidá d'aplicar el conocimientu desendolcáu na Universidá pal desendolcu de productos, procesos y servicios anovadores.

Meyores na formación de los recursos humanos

La collaboración de la Universidá col mundu empresarial abre nueves víes de contratación pa investigadores mozos y programes pa la formación d'investigadores per aciu de la realización de tesis doctorales en collaboración coles empreses. Estes aiciones cunten amás con ayudes y subvenciones públiques, nos más de los casos. La creación de grupos de trabayu mestos ente empreses y grupos d'investigación dexa participar de puntos de vista estremaos qu'arriquecen los resultaos algamaos.

L'artículu 83 de la Llei Orgánica d'Universidaes (LOU) regula la collaboración ente la Universidá y el sector empresarial. Les modalidaes de servicios que la Universidá pue dar nel marcu d'esta Normativa puen axuntase nes categoríes que vienen darréu:

  • Trabayos d'investigación y desendolcu esperimental.
  • Trabayos profesionales empobinaos a la introducción de nueves teunoloxíes.
  • Trabayos de calter artísticu.
  • Xeres de consultoría y conseyu.
  • Servicios téunicos repetitivos.
  • Xeres docentes nel ámbitu de los cursos d'especialización, formación y perfeccionamientu.

Tipoloxía de contratos y servicios más usaos na Universidá d'Uviéu

Proyeutos d'investigación collaborativos

Nestos proyeutos, tanto la empresa como los investigadores trabayen a comuña pa iguar un determináu problema o retu teunolóxicu. Estos proyeutos suelen tener un calter precompetitivu y suelen cuntar con financiamientu de les alministraciones públiques.

Contratos d'investigación

Nos casos d'investigación fecha baxo la modalidá de contratu, les empreses faen un contratu con un grupu d'investigación de la Universidá d'Uviéu pa llevar alantre un trabayu d'investigación, por un importe y con un calendariu previamente establecíu. Les empreses reciben los resultaos apautaos ensin participar nel proyeutu d'I+D.

Contratos d'ufierta de servicios

La ufierta de servicios pue ser perestremada, pudiendo consistir dende un conseyu teunolóxicu, económicu, llegal, o un estudiu de viabilidá venceyáu con una teunoloxía, hasta en la realización d'ensayos o análisis con equipos d'alta teunoloxía, como los que tienen los llaboratorios universitarios. La contrapartida que recibe la Universidá ye económica pol trabayu fechu.

En toos estos contratos la Universidá d'Uviéu fai la facturación de les cantidaes apautaes cola empresa nes feches previstes y retién un 15 % del importe en conceutu d'overheads o costos indireutos.