Investigación, anovamientu y empresa

Una de les tres prioridaes qu’Europa llantó na so Estratexa 2020 ye’l llogru d’un xorrecimientu intelixente. El xorrecimientu intelixente significa la consolidación del conocimientu y l’anovamientu como impulsores del nuesu xorrecimientu futuru.

Les universidaes, amás de meyorar la calidá de la nuesa educación, contribúin, pente medies de la investigación y la tresferencia de conocimientu, a afalar el xorrecimientu económicu, iguar emplegos de calidá y dar seguranza de la competitividá de les rexones nuna economía cada vegada más global.

Un mou de llograr que la investigación académica xenere xorrecimientu ye promover que les idees anovadores puean tresformase en nuevos productos y servicios que respuendan a les necesidaes empresariales y sociales. Darréu d'ello, un factor clave ye la collaboración estratéxica y la tresferencia de conocimientu ente universidaes y empreses.

El nuevu Espaciu Européu d'Educación Superior abre nueves espeutatives a la collaboración ente universidá y empresa, tanto nel ámbitu docente como nel investigador, faciendo vidable l'inxerimientu de llinies d'investigación nel ámbitu universitariu afalaes dende'l sector empresarial.

La existencia de llinies d'investigación d'interés empresarial ye una de les prioridaes de la Universidá d'Uviéu dientro del proyeutu de Campus d'Escelencia Internacional. Pa ello la institución universitaria sofita aiciones pa la solicitú conxunta de proyeutos europeos, nacionales y rexonales y facilita la contratación de proyeutos d'investigación que dexen tratar, con un enfoque d'investigación aplicada, problemes teunolóxicos del mundu empresarial.