Clusters del Campus d’Escelencia Internacional

La Universidá d’Uviéu ye’l motor de la investigación y l’anovamientu dientro de la sociedá asturiana. El proyeutu col que la institución académica algamó’l cuñu de Campus d’Escelencia Internacional ye un apueste pola especialización en dos estayes estratéxiques n’investigación cimera: la enerxía y la biomedicina, al rodiu d’entrambos dos clusters que valgan de puntu d’alcuentru ente investigadores y empreses.

Dientro del proyeutu del Campus d'Escelencia Internacional, la Universidá iguó un Clúster de Biomedicina y Salú y un Clúster d'Enerxía, Mediu ambiente y Cambéu Climáticu. Entrambes estayes d'investigación son sectores en plenu espardimientu con una proyeición que quier contribuyir al camudamientu del texíu productivo asturiano.

Los clusters son un apueste pola especialización na investigación biomédica y el desendolcu d'enerxíes alternatives. Representen un puntu d'alcuentru coles empreses del sector y un sofitu encartiyar proyeutos internacionales

Los clusters de la Universidá d'Uviéu encartiyáronse como puntu d'alcuentru ente los investigadores de la comunidá universitaria y otros centros d'investigación y empreses que lleven darréu la so xera dientro de la biomedicina y el desendolcu d'enerxíes alternatives. El so llabor nos últimos años valió d'obleru pa la fechura de proyeutos conxuntos ente investigadores y empreses.

Per otru llau, l'equipu humanu de los clusters ye un importante sofitu pa que los investigadores asturianos participen en proyeutos de calter internacional, darréu que xestionen un importante númberu de proyeutos Europeos.