Ayudes a la investigación

Les instituciones públiques son güei la fonte principal de financiamientu de los investigadores de la Universidá d'Uviéu. El Gobiernu central afala un Plan Estatal d'Investigación Científica y Téunica y d'Anovamientu 2013-2016 que ta formáu por cuatro programes:

  • Programa estatal de promoción del talentu y empleabilidá
  • Programa estatal de fomentu de la investigación científica y téunica d'escelencia
  • Programa estatal de llideralgu empresarial n'I+D+i
  • Programa estatal d'I+D+i empobinada a los retos globales de la sociedá

El Gobiernu del Principáu d'Asturies tamién convoca añalmente delles ayudes a la investigación como les beques Severo Ochoa pa investigadores mozos y encartiya la so estratexa de política investigadora per aciu d'un Plan de Ciencia, Teunoloxía ya Investigación.

Les ayudes públiques y privaes cubren la meyora de la formación del personal, el sofitu a proyeutos d'investigación y aiciones complementaries o la inversión n'equipamientos

La Xunión Europea ye una vía de financiamientu destacada pa los nuesos investigadores, que cada vegada tien una presencia relevante en proyeutos internacionales de collaboración. La Universidá d'Uviéu algamó ayudes europees a la investigación d'estremaos programes. La Oficina de Proyeutos Europeos ocúpase de tener puntualmente informaos de les convocatories a los investigadores y de da-yos ayuda pa presentar les sos propuestes y facer los trámites alministrativos.

L'aumentu del financiamientu priváu pa investigación ye ún de los retos fundamentales de la Universidá d'Uviéu per aciu del fomentu del patrociniu y el mecenalgu. Los programes d'ayudes afalaos por entidaes privaes empobínense abondes vegaes a una formación especializada nun campu determináu d'investigación o a sofitar aiciones complementaries como les movilidaes internacionales.

Les llinies principales d'ayudes a les que puen aspirar los investigadores de la Universidá d'Uviéu sedríen estes:

  • Meyora de la formación de recursos humanos.
  • Ayudes a proyeutos d'investigación.
  • Ayudes p'aiciones complementaries (estancies internacionales, organización d'aconceyamientos, visites d'otros investigadores, etc.)
  • Ayudes pa infraestructures y equipamientos.

(Toles convocatories d'ayudes a la investigación d'entidaes públiques y privaes puen consultase na Intranet d'Uniovi)