Sofitu a la investigación

La Universidá d’Uviéu sofita una investigación competitiva, creativa y multidisciplinar con una efeutiva tresferencia de conocimientu al sector productivu. El compromisu de la institución cola escelencia fíxola afalar ayudes específiques pa los sos investigadores y entamar estremaes iniciatives pa la busca de talentu.

La institución académica cunta con un plan propiu d'ayudes qu'abre camín a los investigadores mozos y afita les iniciatives nacientes de mayor talentu. Amás, el programa favorez la internacionalización de la investigación fecha n'Asturies y ocúpase d'intentar acoyer a los científicos con mayor talentu fuera de les nueses llendes.

La Universidá d'Uviéu cunta con un plan propiu d'ayudes qu'afita a los investigadores mozos y prioriza la internacionalización y la escelencia

La calidá de los proyeutos desendolcaos nos llaboratorios y aules de la institución asturiana ameritó'l sofitu del Plan Nacional de Ciencia y del Plan rexonal de Ciencia a los investigadores de la Universidá d'Uviéu. Arriendes d'ello, los grupos d'investigación asturianos tuvieren otres víes de financiamientu llogrando l'enfotu d'entidaes privaes nes sos convocatories d'ayudes.

El Campus d'Escelencia Internacional ye un aval pa potenciar y promocionar la investigación de más altor. Pente medies de los sos clusters llográronse nueves víes de sofitu nel terrén de la Biomedicina y la Salú y tamién nel campu de la Enerxía, Mediu ambiente y Cambéu Climáticu. El cuñu d'escelencia de la Universidá d'Uviéu da una proyeición internacional a la investigación per aciu de les ayudes de movilidá que dexen a los nuesos profesores facer estancies en dalguna de les 200 meyores universidaes del mundu.