Profesoráu internacional

La busca de talentu internacional ye una de les aiciones de la estratexa d’internacionalización de la Universidá d’Uviéu. Darréu d’ello, afala ayudes pa estancies temporales de profesores ya investigadores estranxeros y favorez tamién les visites de científicos, les conferencies, lo mesmo que la fechura de proyeutos d’investigación conxuntos con centros internacionales.

La Universidá d'Uviéu cunta con grupos d'investigación de sonadía que desendolquen proyeutos conxuntos con otros centros d'educación superior internacionales. Tanto en docencia como n'investigación, la institución académica tien roblaos alcuerdos en países de tol mundu p'afalar l'intercambiu de profesores.

Nos caberos años, púnxose especial enfotu na movilidá docente con países iberoamericanos y asiáticos. El Campus d'Escelencia Internacional desendolcó un programa d'incorporación d'investigadores d'escelencia vinientes de centros de referencia pa facer estancies temporales na Universidá d'Uviéu, venceyaos sobre manera a los clusters d'Enerxía, Medioambiente y Cambéu Climáticu y Biomedicina y Salú.

Los investigadores estranxeros a los que-yos pruya impartir docencia na Universidá d'Uviéu, facer visites científiques o desendolcar proyeutos d'investigación puen acoyese a una serie de programes de movilidá pa profesores visitantes.

La institución académica cunta, tamién, con una serie de recursos pa facilitar la estancia de los profesores visitantes y la so familia en cualesquiera de los sos campus. La Universidá da encontu pa que los fíos de profesores, investigadores y estudiantes internacionales qu'esfruten d'un periodu d'estudiu, formación, docencia o investigación puean escolarizase na rede educativa pública.

Faise necesario que con calter previu a la movilidá, o llueu de la so llegada, el visitante cumplimente la solicitú colos datos riquíos pa que la Xunta d'Escolarización Temporal del Principáu d'Asturies acute un centru d'estudios pa los fíos, averáu a la so residencia o llugar de trabayu. La rede educativa pública acueye a los neños y rapazos n'edaes comprendíes ente los 4 y 18 años. Tola información sobro'l calendariu escolar y les carauterístiques de los programes d'Educación Primaria, Secundaria y Bachilleratu puen consultase en http://www.educastur.es/. http://www.educastur.es/.

Al marxe de los servicios d'agospiamientu, deprendizax de la llingua española, instalaciones deportives y ufierta cultural, la universidá ufre tamién una formación escelente n'idiomes, con cursos d'español pa estranxeros que s'adauten a toles necesidaes.