Movilidá formación Erasmus

La Universidá d’Uviéu soscribió Alcuerdos Billaterales con universidaes europees, pa llevar alantre Aiciones de movilidá del Personal Docente ya Investigador y del Personal d’Alministración y Servicios con fines de formación.

Esta aición, que s'inxer nel ampliu oxetivu de la formación de personal, acueye dos tipos de movilidá:

  • Movilidá de personal d'una institución d'educación superior a una empresa.
    L'oxetivu ye facer que los beneficiarios depriendan de la tresferencia de conocimientos o de competencies y algamen aptitúes práutiques. Les xeres puen ser perestremaes: seminarios, talleres, cursos y conferencies, periodos de formación práutica, comisiones de servicios curties, etc.
  • Movilidá de personal docente y non docente d'una institución d'educación superior a otra institución d'educación superior socia (pa lo que nun fai falta roblar un alcuerdu interinstitucional).
    L'oxetivu ye facer que los beneficiarios depriendan de les esperiencies y bones práutiques de la institución socia y ameyoren les aptitúes que requier el puestu de trabayu actual. La xera principal ye una estancia curtia na institución socia que pue denomase de delles maneres: comisiones de servicios curties, observación de profesionales, visites d'estudios, etc.

Podrá participar personal docente y non docente d'instituciones d'educación superior que tengan una Carta Universitaria Erasmus (EUC/X). La escoyeta correspuende a la institución d'educación superior de orixe.

A efeutos de la concesión de l'ayuda, ye imprescindible presentar un programa de formación col preste de la institución d'orixe y d'acoyida o pola empresa. El programa habrá incluyir como mínimu: l'oxetivu global y los oxetivos específicos, los resultaos que s'aguarda algamar coles xeres de formación o deprendizax y una posible programación del periodu de formación.