Personal de la Universidá d’Uviéu

La internacionalización ye ún de los elementos tresversales que la Universidá d’Uviéu lleva darréu en toles sos aiciones. L’oxetivu ye algamar una mayor proyeición y visibilidá na escena internacional.

Pa ello entamóse un programa d'actuaciones ambiciosu que plantega enanchar el númberu de convenios internacionales con universidaes ya instituciones d'otros países, afalar económicamente la movilidá, fomentar la capacitación llingüística d'estudiantes, profesores y personal universitario y axixar una formación ya investigación calidable de la mano d'instituciones de sonadía internacional.

Llograr que los nuesos profesores y el personal d'alministración y servicios conozan otres instituciones y otres cultures sedrá un elementu arriquecedor pa desendolcar una universidá abierta, multicultural y más eficiente. El Campus d'Escelencia Internacional de la Universidá d'Uviéu potenció les movilidaes internacionales con dalguna de les 200 meyores universidaes del mundu.

La Universidá d'Uviéu soscribió alcuerdos de movilidá con más d'un millar d'universidaes y centros d'investigación de tol mundu

Un pasu fundamental na estratexa d'internacionalización ye meyorar les competencies llingüístiques de los nuesos profesores y personal d'alministración. Pa ello la Casa de les Llingües ufre una bayurosa ufierta de cursos que dexen algamar titulaciones oficiales reconocíes internacionalmente.

Los estremaos programes de movilidá internacional pa PDI y PAS son una oportunidá pa tender pontes con otres instituciones académiques a la hora d'investigar, xestionar y afalar nueves movilidaes. Les sinerxes ente profesionales d'estremaos centros educativos ayuden tamién a llograr una xestión más eficiente y eficaz.