Vivir n’Asturies

Asturies ye un llugar natural privilexáu dientro de los estremaos paisaxes españoles. De fechu, la comunidá conozse en tol estáu como'l Paraísu Natural, el lema que la define dende hai décades. Una gran parte del territoriu de so cunta con daqué clas de proteición y la so costa alcuéntrase ente les meyor calteníes y menos urbanizaes de tol sur d'Europa. La climatoloxía asturiana favorez la existencia d'una vexetación y fauna bayuroso nun rodiu afechiscu pa prauticar dixebraes xeres al aire llibre o facer deporte.

La espectacular orografía del Principáu dexa alcontrar cumales de más 2.600 metros d'altor y sableres de gran guapura a una distancia en llinia reuta de malpenes diez quilómetros. Esi contraste de paisaxes dexa esfrutar d'unes vistes inigualables y de dalgunos requexos y fenómenos naturales únicos.

"La espectacular orografía asturiana dexa alcontrar cumales de 2.600 metros y sableres de gran guapura a menos de diez quilómetros de distancia"

La bayura natural d'Asturies fai posible una peramplia ufierta d'ociu y deportes d'aventura a lo llargo y ancho del Principáu. La comunidá cunta col Parque Nacional de Los Picos d'Europa y, arriendes d'ello, la UNESCO declaró dientro de les llendes d'Asturies otros cinco territorios consideraos como Reserva de la Biosfera. Esti rodiu natural únicu fixo vidable la sobrevivencia de dalgunes especies en peligru de desaniciu como l'osu pardu cantábricu, el faisán o gallu montés o'l frangüesu.

A lo llargo de los sos más de 350 quilómetros de costa, Asturies axunta cantiles espectaculares con más de 200 sableres, dalgunes d'elles cuasi salvaxes. Trátase d'un asitiamientu afayadizu tol añu pa la práutica de deportes como'l surf.