Empresa

En rellación col inxerimientu llaboral, les xeres que se desendolquen tán empobinaes, per un llau, a dar formación y conseyu personalizáu sobro cómo atopar un emplegu acordies colos estudios fechos y, per otru, a facilitar la información del mercáu llaboral.

La formación desendólcase pente medies de seminarios y tutoríes individualizaes nos centros de la Universidá d'Uviéu. Pela so parte, la información ye accesible pa toos al traviés de l'aplicación informática del serviciu d'emplegu universitariu, qu'esparde les ufiertes d'emplegu recibíes na Universidá d'Uviéu, y del bancu d'emplegu, que dexa al estudiante conocer les ufiertes, beques, premios y concursos publicaos na prensa nacional.

Per aciu d'esta aplicación informática xestiónense tamién les práutiques esternes n'empreses de los estudiantes y les beques de los titulaos universitarios de la Fundación Universidá d'Uviéu.

Accesu a l'aplicación informática

Xunto a estes xeres, la Universidá d'Uviéu fai por fomentar la cultura entamadora ente estudiantes y titulaos. Una de les actuaciones más destacaes ye'l Foru d'Emplegu que se fai cada añu, lo mesmo que les iniciatives empobinaes a la creación de spin off, cursos de formación sobro la creación d'empreses y concursos sobro idees empresariales.

La institución académica asturiana cunta tamién con un preséu de sofitu, l'Axencia de Colocación y del Emplegu Universitariu, qu'exerce como intermediaria nel mercáu llaboral ente les ufiertes y demandes d'emplegu empobinaes a estudiantes y titulaos universitarios.