Campus d’Escelencia Internacional

La Universidá d’Uviéu foi una de les primeres nueve universidaes españoles en llograr en 2009 l’acreitación como Campus d’Escelencia Internacional, con un proyeutu anovador al que s’amestaron más de 300 instituciones y empreses de la comunidá y del estáu.

El proyeutu Ad Futurum. Del XVII al XXI: unviando la nuesa Tradición al alcuentru col Futuru, col que la Universidá d'Uviéu llogró'l cuñu d'escelencia, supunxo un aguiyamientu pal desendolcu de les polítiques d'internacionalización y un sofitu determinante na implantación del Espaciu Européu d'Educación Superior (EEES). El financiamientu llográu col CEI permitió desendolcar munches actuaciones en docencia, investigación y responsabilidá social institucional que sedríen inviables na coxuntura económica de güei.

Nes sos seis exes d'actuación destaca la reordenación de campus, que supunxo la xuntura de 15 centros en seis grandes facultaes y escueles, cola racionalización de recursos qu'ello lleva darréu, y que se punxo como exemplu de bones práutiques nel informe de siguimientu de la Estratexa Universidá 2015, fechu por espertos internacionales.

El CEI Asturies-Ad Futurum dexó tamién abrir camín de la internacionalización de la Universidá d'Uviéu, con programes de movilidá y captación de talentu coles principales universidaes del mundu. Tamién s'afaló l'entamu del Centru Internacional de Posgráu, que xestiona la ufierta de másteres universitarios, títulos propios y programes de doctoráu.

Nel ámbitu de la investigación, el Campus d'Escelencia Internacional fixo un apueste pola especialización en dos estayes pente medies de los clusters d'Enerxía, Mediu ambiente y Cambéu Climáticu, y Biomedicina y Salú. Estos clusters valieron como puntu d'alcuentru ente los investigadores y la empresa.