Cursos xenerales de llingües

La Universidá d'Uviéu, nel so apueste pola internacionalización, afaló nos últimos años la formación n'idiomes. Nesti marcu, La Casa de les Llingües ufierta cursos nuna decena d'idiomes, amás del asturianu y la llingua de signos española

Imagen de la Casa de las Lenguas

La Casa de les Llingües ufierta al rodiu d'un centenar de cursos de distintes llingües: alemán, árabe, chinu, francés, inglés, italianu, xaponés, polacu, portugués, rusu, asturianu y llingua de signos española. Los cursos puen impartise por ún o dellos profesores, toos ellos especialistes en caúna de les llingües, y la edá mínima pa matriculase ye de 17 años.

La formación n'idiomes qu'ufierta la Universidá d'Uviéu espárdese a tolos campus universitarios, amás d'Avilés. EL llargor de los cursos suel ser de 90 hores. Cada grupu, con un máximu de 20 alumnos, recibe dos sesiones selmanales de 85 minutos de duración (llunes y miércoles / martes y xueves).

N'acabando'l cursu, los participantes qu'asistieren a un mínimu del 85% de les hores llectives y superen l'exame final, llograrán un Certificáu d'Aprovechamientu. Los demás estudiantes recibirán, previa solicitú, un Certificáu d'Asistencia.

El profesoráu de niveles non universitarios n'activu, siempres que s'atope dando servicios en dalgún centru calteníu con fondos del Principáu d'Asturies y recibiere'l Certificáu d'Aprovechamientu enantes mentáu, podrá algamar la reconocencia de 5 Creitos de Formación Permanente a instancia de parte.