Tesis doctoral

La tesis doctoral consistirá nun trabayu orixinal d’investigación, fechu pola persona candidata en cualesquier campu del conocimientu. La tesis ha capacitar al doctorandu pal trabayu autónomu nel ámbitu de la I+D+i.

Imagen de estudiantes

Normes d'ellaboración de la memoria de tesis

La memoria de la tesis redactaráse n'español. Sicasí, podrá redautase n'otru idioma oficial de la Xunión Europea, siempres que lo autorice la Comisión de Doctoráu, y el resume y les conclusiones tean n'español. Estes mesmes condiciones aplicaránse si se quier redautar n'asturianu.

Na cubierta y na portada de la memoria figurará:

  • "Universidad de Oviedo", xunto col escudu institucional
  • Programa de Doctoráu
  • Títulu de la Tesis
  • Autor

Tesis como compendiu de publicaciones

La tesis doctoral pue presentase como un compendiu de publicaciones del doctorandu sobro una mesma llinia d'investigación. D'estes publicaciones, como mínimu tres artículos o capítulos tarán espublizaos o aceutaos pa la so espublización llueu del entamu de los sos estudios de doctoráu, nun mediu inxeríu nel Science Citation Index (o equivalente según la CNEAI). El direutor de la tesis habrá acreitar que l'aportación científica del doctorandu a los trabayos foi significativa.

La memoria de tesis presentada baxo esta modalidá habrá tener, pelo menos, los puntos que vienen darréu:

  1. Entamu, nel que se xustifique la unidá temática de la tesis y la bibliografía de sofitu.
  2. Oxetivos.
  3. Discusión de resultaos.
  4. Conclusiones.
  5. Copia completa de los trabayos na que conste'l nome y adscripción del autor y de tolos coautores, si los hubiere, al empar que la referencia completa de la revista o editorial na que los trabayos s'espublizaren o aceutaren pa la so espublización. Nesti casu apurriráse xustificante de l'aceutación per parte de la revista o editorial.
  6. Informe col factor d'impautu de les publicaciones presentaes. Naquelles estayes nes que nun seya aplicable esti criteriu camudaráse poles bases rellacionaes pola Comisión Nacional Evaluadora de l'Actividá Investigadora (CNEAI) pa estos campos científicos.

Los trabayos que formen parte d'una tesis de compendiu de publicaciones nun podrán formar parte d'otra tesis presentada baxo esta mesma modalidá.

Mención Internacional

La Mención Internacional consiste nuna distinción nel títulu de doctor. Podrá solicitase siempres que se dean les circunstancies que siguen darréu:

  1. Qu'a lo llargo del periodu d'investigación el doctorandu fixere una estancia mínima de tres meses fuera d'España nuna institución d'enseñanza superior o centru d'investigación de prestixu, cursando estudios o faciendo trabayos d'investigación. La estancia ha reconocese pol direutor de la tesis, y tien d'acreitase pol responsable del grupu d'investigación del organismu onde se fixere.
  2. Que parte de la tesis doctoral, pelo menos el resume y les conclusiones, tea redautada y presentada nuna de las llingües habituales pa la comunicación científica nel so campu de conocimientu, distinta a cualesquiera de les llingües oficiales n'España. Esta norma nun sedrá d'aplicación cuando les estancies, informes y espertos seyan d'un país de fala hispana.
  3. Que la tesis cunte col informe previu d'un mínimu de dos espertos doctores pertenecientes a dalguna institución d'educación superior o institutu d'investigación non español estremáu del que fixere la estancia.
  4. Que forme parte del tribunal de la tesis pelo menos un doctor espertu perteneciente a dalguna institución d'educación superior o centru d'investigación non español, estremáu de los qu'emitieren los informes mentaos nos apartaos 1) y 3).

Tesis en cotutela con universidaes estranxeres

Ye posible facer la Tesis Doctoral en réxime de cotutela con una Universidá estranxera, col envís d'algamar el títulu de Doctor o Doctora por entrambes Universidaes. Requier la movilidá del doctorandu ente una y otra universidá, con una estancia mínima de nueve meses en caúna de les dos universidaes. La tesis sedrá oxetu d'una defensa única en cualesquiera de les dos universidaes, pero'l doctorandu habrá de tar matriculáu nes dos y la tesis depositada y aceutada pa la so espublización n'entrambes.

Pa ello ha roblase un conveniu específicu pa cada doctorandu ente la Universidá d'Uviéu y la Universidá estranxera. La propuesta de conveniu ha presentase pol muérganu responsable del programa a la Comisión de Doctoráu pa la so aprobación.

Procesu de llectura de la tesis