Estudios

La Universidá d’Uviéu ufre al estudiante un ampliu catálogu de titulaciones de grau adautaes al Espaciu Européu d’Educación Superior, una ufierta anovada de posgraos y la posibilidá d’aniciase na investigación d’escelencia per aciu de doctoraos d’alta calidá. Arriendes d’ello, cunta con una bayurosa ufierta de cursos d’estensión universitaria y aules especializaes, formación n’idiomes y un completu programa pa mayores.

La Universidá d'Uviéu imparte más de mediu centenar de graos, adautaos al Espaciu Européu d'Educación Superior (EEES), que dan una importante formación teórica y práutica.Trátase d'estudios de 240 creitos ECTS (4 cursos), sacante los casos de Medicina y Odontoloxía, qu'algamen los 360 y los 300 creitos, respeutivamente.

Más de 25.000 estudiantes tán matriculaos en dalgún de los graos y posgraos qu'ufierta la Universidá d'Uviéu

Los programes de grau complétense cola ufierta de másteres universitarios, que cinca a toles estayes de conocimientu, con una clara vocación internacional y abriendo nuevos calces pal inxerimientu llaboral de los estudiantes. Estes titulaciones tienen, con calter xeneral, una estensión mínima de 60 creitos ECTS (un cursu académicu) y máxima de 120 ECTS (dos cursos académicos).

La institución académica asturiana cunta con una formación académica moderna, entamadora y competitiva, qu'apuesta pola investigación científica, pente medies de la so ufierta de doctoráu, y pol desendolcu dafechu de los sos estudiantes. Esta institución ufierta la posibilidá de participar en programes de movilidá ya intercambiu nacional ya internacional d'estudiantes y una gran variedá de cursos d'estensión universitaria, cursos de branu, formación n'idiomes, al empar qu'un programa empobináu a mayores de 50 años (PUMUU).

L'atención a los estudiantes internacionales, los programes de movilidá, la especialización, la enseñanza billingüe y los servicios complementarios de sofitu al estudiante faen de la institución académica asturiana y del so Campus d'Escelencia Internacional ún de los meyores centros pa dar rempuesta a los enfotos de cualquier alumnu que quiera cursar estudios superiores.

La calidá docente y la escelente investigación que se desendolca nos centros y departamentos de la Universidá d'Uviéu complétense con una atención con procuru al estudiante dende l'accesu hasta la graduación.