Noticias

  • La Universidá d'Uviéu y Caxa Rural d'Asturies constitúin la Cátedra Archivo de la Tradición Oral d'Asturies

    10 de Xunu 2019

    La cátedra cunta colos fondos de cultura oral y popular del investigador Jesús Suárez López, unu de los repositorios más notables d'Europa

    Santiago García Granda y José María Quirós Rodríguez.
    El rector de la Universidá d'Uviéu, Santiago García Granda, y el presidente de Caxa Rural d'Asturies, José María Quirós Rodríguez, roblaron esta mañana un conveniu para la constitución de la Cátedra Archivo de la Tradición Oral d'Asturies. La cátedra va planiar y va executar programes, acciones y actividaes de bien variada naturaleza, que van tar especialmente rellacionaes cola divulgación y tresferencia de conocencia, la investigación, y la formación, alquisición  y caltenimientu de fondos documentales.
     
    El presente conveniu, que foi robláu nel Edificiu Históricu, va tener una vixencia de dos años y entró a valir cola so firma. La dirección de la cátedra va ser asumida pol profesor del Departamentu de Filoloxía Española de la Universidá d'Uviéu Xulio Viejo Fernández, escritor, espertu en llingüística, lliteratura, llingua asturiana y hestoria de la llingua.
     
    Al momentu de la so constitución, la cátedra cunta colos fondos del repositorio de cultura oral y popular y de patrimoniu inmaterial del investigador Jesús Suárez López, quien va formar parte del equipu de la cátedra. Dichu repositorio, consideráu'l más importante d'España y unu de los más relevantes d'Europa, ta integráu por más de mil hores de grabaciones n'audiu y video, según una colección de fotografíes de gran valor documental, científicu y artísticu. Esti trabayu non solo se circunscribe a Asturies sinón que tamién toma localidaes de Cantabria, Llión, Zamora, Salamanca, Cáceres, Llugo, Ourense y norte de Portugal.
     
    Coles mesmes, l'arquivu caltien unos 30.000 rexistros de lliteratura oral, amás de numberosos testimonios relativos a la Guerra Civil española, la posguerra, la Segunda Guerra Mundial, los oficios tradicionales y la vida cotidiana na Asturies del sieglu XX. Coles mesmes, arrexunta abondosos testimonios de la emigración asturiana a América y Europa, una implicación que confier a la cátedra un calter internacional y que va dexar la so espansión al traviés de les asturianes y asturianos emigraos que caltienen y espublicen el mancomún cultural d'Asturies.
     

    Imaxes:


Buscar