Noticias

  • El Rector presenta al claustru'l balance añal y los planes estratéxicos de la Universidá para los próximos cinco años

    17 de Payares 2017

    Santiago García Granda espunxo énte'l máximu órganu de representación de la institución les principales cifres del presupuestu pal exerciciu 2018

    El rector de la Universidá d'Uviéu, Santiago García Granda, presidió esta mañana la xunta del Claustru universitariu, na Aula Magna de la Facultá d'Economía y Empresa, xunta na que presentó'l balance de 2017 y los planes estratéxicos de la institución académica para los próximos cinco años. El Rector repasó les principales midíes destinaes al estudiantáu, ente elles l'ampliación del númberu de plazos p'abonu de matrícula, a cinco anguaño, y l'aumentu ayudes pa estudiantes ensin recursos y de tresporte y materiales; l'apertura de la residencia "Rafael Altamira"; la celebración de les Xornaes d'Orientación Universitaria, con 5.000 estudiantes, y de Puertes Abiertes, con 3.500 estudiantes; l'aumentu de práctiques esternes remuneradas y l'ampliación de la formación n'idiomes, según la Creación Mesa del Estudiantáu.
     
    En cuanto al Personal d'Alministración y Servicios (PAS), García Granda fixo referencia al alcuerdu relativu a les actuaciones a entamar, suscritu ente la Universidá y sindicatos, al plan de formación obligatoriu, complementariu del Plan de Formación Continua, a la ufierta d'empléu públicu con places per promoción interna y llibres, tanto pa la PAS funcionariu como llaboral, y a la constitución de la comisión pa la redacción del plan estratéxicu de recursos humanos de la PAS.
     
    Respectu al Personal Docente ya Investigador (PDI), el Rector sorrayó les midíes adoptaes pa la renovación de plantiya, con 61 cátedres, 67 titularidaes, 20 places de profesoráu contratáu doctor, eliminación progresiva de les places d'asociáu impropiu, incorporación de nuevu talentu (reglamentu de collaboración docente con casi 400 collaboradores na docencia), los nuevos criterios de reconocencia y amenorgamientu de l'actividá docente del profesoráu, l'actualización de reglamentos de Profesores Eméritos, Eméritos Honoríficos y Profesores Honorarios, según el desenvolvimientu de les competencies llingüístiques cola ampliación de la ufierta de cursos d'inglés.
     
    No que respecta al Pan de financiamientu 2018/2022 (BOPA 7 de payares), les cifres xuben, pa 2018, a 131.344.967 euros, revisables a partir del primer añu. En concretu, l'aportación del Principáu d'Asturies pa 2018 va ser de 128.802.084 euros: el financiamientu ordinariu 126.202.084 €, el financiamientu por resultancies 1.000.000 euros, y el plan d'inversiones, cofinanciáu al 80%, de 2.000.000 euros. D'esta forma, los presupuestos de la Universidá d'Uviéu pa 2018 espérase que superen probablemente los 200 millones d'euros.
     
    Santiago García Granda presentó amás el plan estratéxicu de la institución pa los años 2018-2022, que va tener como oxetivos principales influyir viviegamente nel desenvolvimientu territorial asturianu y español, aumentar la tresparencia de la institución, y tresmitir el valor de la universidá na sociedá asturiana. En plan redactóse tres una fase d'analís con más de 200 entrevistes con personal de la Universidá d'Uviéu, grupos de trabayu con xuntes periódiques, de la Universidá, la empresa y l'alministración pública, l'estudiu del funcionamientu d'otres organizaciones y los sos planes estratéxicos, y l'establecimientu de dos unidaes estratéxiques d'actividá: formación, actividá docente y empleabilidá, ya investigación y tresferencia.
     
    La sesión incluyó amás l'informe de la defensora universitaria, Paz Andrés Sáenz de Santa María, y tomar de postura del Claustru en relación colos precios públicos académicos, a propuesta de 28 claustrales del colectivu C1 (estudiantes), que foi aprobada por mayoría ensin votos en contra.
     

Buscar