Accesu a los estudios

Accesu a graos

P'acceder a estudios universitarios oficiales dende'l Bachilleratu, ye necesario tener aprobada la Fas Xeneral de la Prueba d'Accesu a la Universidá (PAU). Pela so parte, los estudiantes que tean en posesión de los títulos de téunicu superior de Formación Profesional, téunicu superior d'artes plástiques y diseñu, o téunicu deportivu superior podrán acceder ensin falta de facer dicha prueba, sacante que quieran cursar estudios con places llendaes, pa lo que puen dir a la Fas Específica pa xubir nota.

Hai, amás, la posibilidá d'acceder a los estremaos graos per treslláu d'espediente o cambéu d'estudios, y tamién se permite la matrícula estraordinaria n'asignatures o cursos aisllaos, col envís d'enanchar conocimientos non empobinaos al llogru de títulos oficiales.

Matrícula on line pa empecipiar estudios ensin llende de places y siguir estudios de grau

Nel casu de cuntar con un títulu universitariu de grau, diplomáu universitariu, arquiteutu téunicu, inxenieru téunicu, llicenciáu, arquiteutu, inxenieru, correspondientes a l'anterior ordenación de les enseñances universitaries o títulu equivalente, los estudiantes fadrán el mesmu procesu de solicitú de plaza que'l restu d'alumnos qu'entamen estudios universitarios. Nel casu de títulos con places llendaes, los centros acuten ente un 1% y un 3% de places pa titulaos.

Accesu a posgraos

La Universidá d'Uviéu cunta con una completa ufierta d'estudios de posgráu: másteres universitarios, títulos propios y programes de doctoráu. P'acceder a estos estudios precísase tar en posesión d'un títulu universitariu ya inclusive d'un máster oficial nel casu del doctoráu. Tola ufierta ta coordinada pol Centru Internacional de Posgráu.

L'estudiante que quiera cursar un máster universitariu ha tener un títulu universitariu oficial español o otru llibráu por una institución d'educación superior perteneciente a otru Estáu inxertu nel Espaciu Européu d'Educación Superior que faculte nel mesmu pal accesu a enseñances de máster.

Polo que cinca al doctoráu, la Universidá d'Uviéu cunta con tolos sos programes adautaos al Espaciu Européu d'Educación Superior. P'acceder al doctoráu ye necesario tar en posesión d'un títulu oficial de máster universitariu o anterior a la implantación del EEES equivalente. La fas de doctoráu ye fundamentalmente investigadora y, darréu d'ello, requier un procesu d'almisión particular rexíu pola comisión académica del programa de doctoráu.

Nel casu de los títulos propios, la institución académica asturiana ufierta programes de máster, especialista y espertu, con una clara orientación profesional en toles estayes de conocimientu. Pa la fechura d'un máster, cursu d'especialista o espertu esíxese como requisitu previu tener un Títulu Universitariu oficial. De forma esceicional, puen almitise profesionales direutamente venceyaos cola especialidá del cursu que nun tengan titulación, siempres qu'acreíten documentalmente esta profesionalidá y tengan los requisitos llegales pa cursar estudios na Universidá.