Doctoráu: ayudes predoctorales y posdoctorales

El doctorandu pue esfrutar d’un máximu de 4 años d’ayudes pa la fechura de la so tesis. Una y bones acabada, tien la opción de pidir les ayudes estatales y autonómiques pa investigadores.

La superación del doctoráu da derechu a la obtención del títulu de Doctor, que representa'l nivel cimeru na educación superior y acreíta'l más altu rangu académicu. Pa estos años d'investigación, l'estudiante cunta con una serie de beques y ayudes, tanto predoctorales como posdoctorales.

Pa cursar el periodu de doctoráu hai dixebraos programes de beques y ayudes estatales y de la comunidá tanto pa la etapa predoctoral como pa la posdoctoral, una vegada que s'acaba la tesis

Beques predoctorales

Les ayudes pa la fechura de tesis doctorales dexen la incorporación de titulaos superiores a grupos d'investigación de la Universidá d'Uviéu, siempres que nun consiguieren acceder per aciu de convocatories nacionales o autonómiques. Esta convocatoria publicaráse nel Boletín Oficial del Principáu d'Asturies (BOPA).

La sovención concedida tendrá un llargor d'un añu, pudiendo anovase hasta un máximu de tres periodos adicionales. Si se cumplen les condiciones del Estatutu del Personal Investigador en Formación, procederáse a formalizar contratu en práutiques dende'l tercer añu.

Beques y ayudes nacionales

  • Beques de Formación de Personal Universitario (Beques FPU). Son beques arreyaes a un Grupu d'Investigación y pídense presentando un proyeutu d'investigación que tien que rematar nuna Tesis Doctoral y que ha cuntar col preste d'un investigador consolidáu qu'empobine les actividaes del solicitante. Son beques per 4 años. Los 2 primeros –col grau de becariu– coinciden cola etapa del llogru del preste investigador. Los 2 años vinientes l'estudiante desendolca las so investigación como personal contratao pola Universidá d'Uviéu.
  • Beques de Formación de Personal Investigador (Beques FPI). Son beques arreyaes a un Proyeutu d'Investigación previamente concedíu a un Equipu d'Investigación. Añalmente, el Ministeriu correspondiente ufierta les places de beques FPI disponibles nos proyeutos del Plan Nacional concedíes nes convocatories anteriores. Los interesaos han optar a estes beques presentando'l so Currículum Vitae y contautando col Investigador Principal del proyeutu concedíu. Son tamién beques per 4 años, con 2 años de becariu y 2 de personal contratao, con carauterístiques perasemeyaes a les beques FPU.

Beques y ayudes de la comunidá

  • Beques Severo Ochoa. Estes beques son la versión de la comunidá de les beques estatales de Formación de Personal Universitario (FPU), con carauterístiques mui asemeyaes. Convién solicitar les beques FPU y les de Formación de Personal Investigador (FPI) enantes de les Beques Severo Ochoa.
  • Becarios y Contrataos en proyeutos d'Investigación del Plan de la comunidá d'Investigación. Arreyaes a los Proyeutos d'Investigación concedíos nel ámbitu de la comunidá, hai davezu places de becariu o de personal contratao a lo llargo de la duración del proyeutu d'investigación.
  • Becarios y Contrataos en Proyeutos de Tresferencia de Teunoloxía con empresa. Son tamién una fonte importante de financiamientu pa entamar nos llabores d'investigación, ya mesmamente puen ser una ponte perinteresante pal exerciciu profesional que nun convién escaecer.

Beques posdoctorales

Los estudiantes quie finaren los sos estudios de doctoráu puen enanchar la formación investigadora acoyéndose de les ayudes del Programa Nacional de Contratación ya Incorporación de Recursos Humanos d'Investigación, perteneciente a la Secretaría d'Estáu d'Investigación, Desendolcu ya Anovación del Ministeriu d'Economía y Competitividá.

D'igual mou, tienen la posibilidá d'acoyese al Programa Clarín d'Ayudes pa la realización d'estancies d'investigación posdoctorales, del Gobiernu del Principáu d'Asturies. La so finalidá ye «desendolcar toes aquelles aiciones que dean puxu a la investigación científica, al progresu teunolóxicu y a l'actividá anovadora na comunidá».

Programes Nacionales d'Investigación

  • Subprograma Torres Quevedo, que financia «la contratación de doctores y teunólogos n'empreses, asociaciones empresariales, centros teunolóxicos y parques científico-teunolóxicos».
  • Subprograma Ramón y Cajal pa la incorporación de doctores a centros españoles d'I+D.
  • Subprograma Juan de la Cierva, que tien como finxu dar una atención especial a los investigadores que se doctoraren de recién pa que se puean inxertar n'Equipos d'Investigación.

Programes d'investigación de la comunidá

El Programa Clarín d'Ayudes pa la realización d'estancies d'investigación posdoctorales forma parte del Plan de Ciencia, Teunoloxía ya Anovación d'Asturies (PCTA) del Gobiernu del Principáu. La so finalidá ye «desendolcar toes aquelles aiciones que dean puxu a la investigación científica, al progresu teunolóxicu y a l'actividá anovadora na comunidá». Dientro d'esti Programa ufiértense ayudes pa que, n'algamando'l títulu de Doctor, los investigadores puean facer estancies n'Universidaes o Centros d'Investigación d'escelencia de países estranxeros y, esceicionalmente, españoles. Los centros receutores han tener un prestixu reconocíu nel ámbitu d'investigación del proyeutu presentáu.

Incorporaciones

Llueu d'algamar el títulu de Doctor, hai delles opciones d'incorporación llaboral, como l'accesu al centru d'investigación d'una empresa, a un institutu d'investigación o a la plantiya de docentes de la propia Universidá o d'otres universidaes. L'accesu a la docencia universitaria llógrase per aciu de les estremaes convocatories de places de profesor. Trátase d'una opción especialmente interesante pa los becarios FPI, FPU o asemeyaos, y pa los Profesores Ayudantes. Estos últimos cunten cola ventaya de tener una esperiencia docente adicional, llograda compaxinando llabores docentes ya investigadores, pudiendo recoyer nesti puntu los frutos del esfuerciu adicional fechu.

Otres ayudes

  • Ayudes a la movilidá. Beques y ayudes empobinaes a promover l'intercambiu ente los grupos d'investigación y a facilitar el llogru de la Mención de Doctor Internacional. Les convocatories son nacionales y de la Universidá d'Uviéu y tienen llugar a lo llargo del cursu académicu.

    http://www.educacion.gob.es/horizontales/servicios/becas-ayudas- subvenciones/para-estudiar/doctorado.html

  • Oportunidaes de la propia Universidá d'Uviéu. La propia institución académica ufierta beques predoctorales perasemeyaes a les Beques FPI y les Severo Ochoa del Principáu d'Asturies, magar que son de cuantía y carauterístiques más reducíes. Ye importante solliñar que pa optar a esta mena d'ayudes ye obligatorio que se solicitare una beca nacional (FPI o FPU) y una de la comunidá (Severo Ochoa) y que tea refugada.
  • Beques d'empresa y Fundaciones. Dalgunes empreses y fundaciones convoquen beques, premios y ayudes que tamién son una fonte de financiamientu importante.
  • Beques y contratos d'otres instituciones nacionales o estranxeres. Dase davezu qu'otres universidaes nacionales o europees ufierten beques y contratos d'entamu a la investigación. Nesti apartáu ye interesante mentar les Aiciones Marie Curie, que faen posible estancies predoctorales y posdoctorales n'Universidaes, Empreses o Centros d'Investigación Europeos, bien de forma individual o bien arreyaes a un proyeutu d'investigación européu. Les Aiciones Marie Curie tamién financien la vuelta al país d'orixe, bien a una Universidá, a un centru d'Investigación o a una empresa. Ameriten consultase, darréu que son una oportunidá importante pa entamar y afitase na investigación dende una perspeutiva de movilidá ya inxerimientu nel contestu européu.

Documentos