Beques y ayudes

Los universitarios cunten con estremaes beques y ayudes pa sofitar los sos estudios. El catálogu ye ampliu y va dende’l pagu de la matrícula hasta material, desplazamientos, residencia o movilidá nacional ya internacional.

Arriendes de la convocatoria de beques de calter xeneral y de movilidá del Ministeriu d'Educación, Cultura y Deporte, qu'inxer beques de matrícula, material, desplazamientu, residencia o proyeutu fin de carrera, la Universidá d'Uviéu empobina una parte importante del so presupuestu a beques y ayudes al Estudiante.

Esti programa propiu de la institución académica representa ún de los instrumentos que contribúi a facer posible'l principiu d'igualdá d'oportunidaes nel exerciciu del derechu a la educación recoyíu na Constitución. Los oxetivos del programa son los que vienen darréu:

  • Garantizar l'accesu a la educación universitaria a toos aquellos estudiantes que nun tengan los recursos económicos necesarios y/o xustifiquen determinaos requisitos académicos.
  • Facilitar l'accesu a la formación universitaria y el desendolcu de los sos estudios en condiciones d'igualdá a estudiantes con discapacidá.
  • Encontar económicamente a estudiantes con dificultaes económiques d'urxente necesidá surdíes de circunstancies personales/familiares remanecíes con posterioridá al entamu del cursu académicu.
  • Completar la formación de los alumnos per aciu de la convocatoria de beques de collaboración n'estremaos universitarios y la fechura de práutiques n'empreses ya instituciones que faciliten el so inxerimientu nel mundu llaboral al finar los estudios.
  • Axixar la participación estudiantil nos estremaos ámbitos universitarios.

Tanto los programes nacionales como los propios de la Universidá d'Uviéu inclúin ayudes pa graos, másteres universitarios, doctoráu y títulos propios. Arriendes d'ello, dalgunes convocatories específiques quieren afalar el deporte, y la escelencia académica.

La Universidá d'Uviéu cunta tamién con un programa específicu de beques de collaboración pa que los estudiantes faigan compatibles los sos estudios con un serviciu en vicerrectoraos, centros, departamentos, institutos y servicios universitarios.