Accesu y ayudes

La ufierta académica de la Universidá d’Uviéu inclúi graos, másteres y doctoraos, al empar que programes de movilidá internacional y nacional. Delles beques y ayudes contribúin a facer vidable’l principiu d’igualdá d’oportunidaes

La Universidá d'Uviéu imparte estudios de grau y posgráu (máster y doctoráu), y ufre, amás, propuestes de movilidá internacional y nacional, al empar qu'un programa específicu empobináu a mayores de 50 años (PUMUU).

P'acceder a los estudios universitarios oficiales dende'l Bachilleratu, ye imprescindible aprobar la Fas Xeneral de la Prueba d'Accesu a la Universidá (PAU). La Universidá d'Uviéu fai cada añu dos convocatories, una ordinaria, en xunu, y una estraordinaria en xunetu.

D'igual mou, los estudiantes que tean en posesión de los títulos de téunicu superior de Formación Profesional, téunicu superior d'artes plástiques y diseñu, o téunicu deportivu superior podrán acceder, ensin necesidá de facer la prueba, a estes enseñances universitaries de grau.

Tamién ye posible facer un treslláu d'espediente dende otra Universidá, o acceder per primer vegada a los estudios universitarios pel procedimientu d'accesu pa mayores de 25 y 45 años, o pa mayores de 40 años con esperiencia profesional.

La Universidá d'Uviéu fai cada añu dos convocatories de PAU, y pruebes d'accesu pa mayores de 25 y 45 años, y 40 años con esperiencia profesional

La ufierta d'estudios de máster, pela so parte, supón un apueste pola internacionalización y la collaboración interuniversitaria, y contribúi al desendolcu de les capacidaes más afayadices pal futuru profesional escoyíu. A los que-yos pruya acceder a dichos estudios han tar en posesión d'un títulu universitariu oficial.

Acabante facer el máster ye posible entamar el programa de doctoráu, que compriende fundamentalmente la ellaboración y presentación de la tesis doctoral, y que tien como oxetu la formación avanzada del estudiante en téuniques d'investigación.

Polo que cinca a les beques y ayudes, a les convocatories oficiales del Ministeriu d'Educación, Cultura y Deporte, amiéstense les propies de la Universidá de nueso y les vinientes d'instituciones o empreses. Dende'l Campus d'Escelencia Internacional, por exemplu, promúevense ayudes de movilidá pa estudiantes de máster o doctoráu, que s'axunten a les beques pa cursar estudios fuera como les subvenciones nel marcu del programa Erasmus.