Noticias

  • ‘Versos pa Tragasables' y el poemariu ‘Llugares últimos' ganen el IV Concursu Lliterariu de la Universidá d'Uviéu

    28 de Xunetu 2014

    Silvia Pérez llogró la reconocencia del xuráu na modalidá de Relatu Curtiu y Diego Álvarez Miguel llogra'l galardón na categoría de Poesía

    Silvia Pérez y Diego Álvarez, ganadores del IV Concursu de Relatos de la Universidá d'Uviéu nes modalidaes de relatu y poesía, respectivamente

    Un circu ambulante ambienta el relatu Versos pa Tragasables, de Silvia Pérez, estudiante de Química; ente que Llugares últimos axunta los poemes nos que Diego Álvarez Miguel, acabante graduar n'Inxeniería de Telecomunicaciones, trabayó los últimos dos años. Ellos acaben de ser reconocíos como ganadores de la IV edición de Concursu Lliterariu de la Universidá d'Uviéu nel que participaron un total de 37 orixinales. El galardón ta dotáu con 1.000 euros pa cada un de los ganadores y l'edición de los llibros.

    Versos pa Tragasables ye la obra ganadora na categoría de Relatu Curtiu. Fay dos años que Silvia Pérez empezó a escribir esta hestoria protagonizada por Mimo y Tragasables nun circu. Una obra que, según esplica la so propia autora, zarra "una pieza de rompecabeces en cada escena." La frase inicial de la novela desencadenó'l restu de la trama: "¿Cuándo foi la última vegada que te atrevisti a desatufar estrelles con daquién?..."

    Diego Álvarez Miguel axuntó en Llugares últimos los sos meyores poemes de los últimos dos años. La so obra yá fuera reconocida na segunda edición del Concursu Lliterariu de la Universidá d'Uviéu, naquella ocasión gracies al relatu Los trés mil cuentos de Marcelino Tongo, escritu al pie de Jaime Martínez. La so última obra publicada Un día, tres otoños recibió'l premiu Gloria Fuertes de Poesía Xoven.

    El xuráu del certame, presidíu pol vicerrector d'Estensión Universitaria y Comunicación, Vicente Domínguez, tuvo compuestu pol poeta Julio Rodríguez, la profesora del Departamentu de Filoloxía Española Virginia Gil Amate, el profesor de Departamentu de Filoloxía Clásica y Románica Aurelio González Ovies, y el director d'área d'Estensión Universitaria, Leopoldo Sánchez Torre.


Buscar