Noticias

  • La Universidá d'Uviéu contribúi al diseñu d'un sistema que prediz la capacidá d'un suelu de autodescontaminarse

    29 de Agostu 2012

    Investigadores del CSIC y les Universidaes d'Uviéu ya Isles Baleares crean una base de datos qu'axunta les enzimes y microorganismos capaces de destruyir contaminantes

    Un equipu multidisciplinar d'investigadores del Conseyu Cimeru d'Investigaciones Científiques (CSIC), la Universidá d'Uviéu y l'Universidá de les Isles Baleares desenvolvió una plataforma bio-informática qu'analiza la capacidá d'un ecosistema d'asimilar cientos de contaminantes. El trabayu, publicáu na revista ISME J del grupu de Nature, abre nueves perspectives pa determinar la capacidá de autodescontaminación d'un suelu afectáu por arramaos como'l petróleu o ciertos hidrocarburos arumosos, a partir de la secuenciación del ADN de microorganismos.

    Los científicos ellaboraron una base de datos específica qu'axunta tola información disponible hasta'l momentu sobre les enzimes y los posibles microorganismos que les contienen y que, de forma natural, son capaces de destruyir ciertos contaminantes. El sistema dexa establecer la buelga dactilar de cada ecosistema, y, amás, prediz en qué suelos puede ser más eficaz la biorremediación, basada n'utilizar elementos naturales del propiu ecosistema pa revertir la degradación d'un suelu contamináu.

    "La plataforma esquiza'l material genómico d'organismos vivos en busca d'información sobre reacciones de biodegradación y ufierta un perfil únicu pa cada ecosistema. N'otres palabres, da una visión a tiempu real de les capacidaes biodegradatives d'un ecosistema, y por tanto, de la so capacidá pa autodescontaminarse", esplica l'investigador del CSIC nel Institutu de Catálisis y Petroleoquímica Manuel Ferrer.

    Pa monitorizar la presencia o ausencia d'estos microorganismos y les propiedaes que cada unu tien en suelos con distintes condiciones, los investigadores aplicaron distintes técniques de bioloxía de sistemes como la xenómica, basada na secuenciación del ADN del suelu, la proteómica, que supon la secuenciación de les proteínes en cada momentu del procesu, y la bioestadística, que consiste na sistematización y l'encruz de datos.

    "Cada ecosistema contien millones de bacteries que de la mesma contienen miles d'enzimes y evaluar la presencia o ausencia de les mesmes ye casi imposible si emplegamos los métodos d'analises genómicos convencionales usaos hasta la fecha", señala Jesús Sánchez, investigador del Institutu de Biotecnoloxía de la Universidá d'Uviéu.

    Un procesu sostenible y más baratu

    Los aproximamientos metodolóxicos siguíes nel trabayu, incluyida la base de datos ellaborada ye pa los científicos "una oportunidá ensin precedentes". L'estudiu afayó tamién que les capacidaes metabóliques de les enzimes y los microorganismos camuden cuando'l suelu sométese a distintos tratamientos de llimpieza.

    "D'esta forma, vamos poder estremar ecosistemes que van poder ser más fácilmente descontaminados d'aquellos que non, esto ye, va dexar establecer diferencies nes capacidaes descontaminantes y, por tantu predicir la eficacia de los tratamientos de biorremediación", asegura Ramón Rosselló-Móra, investigador del CSIC nel Institutu Mediterráneu d'Estudios Avanzaos, un centru mistu del CSIC y l'Universidá de les Isles Baleares.

    Según l'investigador del CSIC nel Centru Nacional de Biotecnología Javier Tamames, "les técniques de biorremediación dexen encarar la descontaminación de suelos aprovechando'l potencial metabólicu de dalgunos de los sos componentes pa la llimpieza. Conviértense asina nuna alternativa más sostenible y barata qu'otros métodos pa esaniciar borrafes y contaminantes".

    L'estudiu, resultáu de cinco año de trabayu, forma parte d'un proyectu Consolider financiáu pol Ministeriu d'Economía y Competitividá, que tien como oxetivu estudiar la biodiversidá de poblaciones de distintos hábitats dientro de la xeografía española, dos proyectos europeos (MAGICPAH y ULIXES), centraos na investigación de la biodiversidá de poblaciones en suelos y ambientes marinos de la xeografía europea de distintos hábitats, y un proyectu CENIT-07-CLEAM de la Universidá d'Uviéu, empobináu al desenvolvimientu de técniques innovadores de biorremediación y llaváu de suelos contaminaos.


Buscar