Noticias

  • Una ventena de científicos van dar a conocer n'Uviéu les sos últimes meyores n'investigación biomédica

    22 de Mayu 2012

    La Universidá d'Uviéu y la Fundación Ramón Areces entamen un simposio internacional sobre'l lleldu como modelu pa la investigación biomédica

    El catedráticu Fernando Moreno ye'l coordinador del simposio.

    La Universidá d'Uviéu va acoyer, los díes 23 y 24 de mayu, el simposio El Lleldu: un Organismu Modelo pa la Investigación Biomédica, nel que ventiún especialistes de distintos países van esplicar les sos últimes investigaciones realizaes con lleldu avera del avieyamientu, el cáncer, la diabetes, según distintes enfermedaes neurodegenerativas y mitocondriales.

    El simposio internacional va ser inauguráu'l miércoles, 23 de mayu, a les 9:00 hores na Aula Magna del Edificiu Históricu, pola vicerrectora d'Investigación y Campus d'Excelencia Internacional, Mª Paz Suárez Rendueles. Al alcuentru van allegar espertos d'Estaos Xuníos, Reinu Uníu, Alemaña y Francia, amás d'investigadores españoles.

    Esti simposio internacional, que ta coordináu por Fernando Moreno Sanz, catedráticu del Departamentu de Bioquímica y Bioloxía Molecular de la Universidá d'Uviéu, va cuntar cola participación del investigador Sergio Moreno (Universidá de Salamanca y CSIC), discípulu del Premiu Nobel y Premio Príncipe d'Asturies Paul Nurse, que los sos estudios con lleldu fueron fundamentales pa entender con detalle'l mecanismu de la división celular, un pasu crucial na llucha contra'l cáncer. Precisamente Sergio Moreno va falar sobre la diferenciación celular y el cáncer.

    Tamién van participar otros científicos como Arturo Casadevall (Universidá Yeshiva, Nueva York), espertu en roxura microbiana; Flaviano Giorgini (Universidá de Leicester), que va presentar una investigación rellacionada cola enfermedá de Huntington; y Valter Longo (Universidá de California del Sur), quien va dar a conocer un estudiu sobre'l nanismu y la llonxevidá.

    Los esperimentos con lleldu dexen revelar la función de los xenes implicaos n'enfermedaes humanes porque les sos célules guarden cierta semeyanza coles nueses. Coles mesmes, les pruebes con lleldu llevense a cabu a mayor velocidá y con un costu inferior a les que se desenvuelven con mures, que son necesaries nun pasu posterior.

    El simposio, que cunta con financiamientu de la Fundación Ramón Areces, va celebrase na Aula Magna del Edificiu Históricu de la Universidá, en sesiones de mañana y de tarde, con proyección simultánea na Aula Gradiada. La entrada ye llibre pa tolos comenenciudos. Por tratase d'un alcuentru internacional de calter científicu, les ponencies van impartise n'inglés ensin traducción.


Buscar