Noticias

  • Un trabayu sobre la influencia del exerciciu físicu nel sistema inmunitario gana'l XVI Premiu Nacional en Medicina del Deporte

    28 de Febreru 2014

    Los galardones, entamaos pola Universidá d'Uviéu y patrocinaos por Cajastur, recibieron anguaño más d'una trentena de trabayos del más altu nivel

    Miembros del xuráu del premiu de Medicina del Deporte.

    Un novedosu trabayu sobre la influencia que tien l'exerciciu físicu sobre'l sistema inmunitario foi estremáu col primer premiu de la XVI edición de los Premios Nacionales de Medicina Deportiva qu'entama la Escuela de Medicina del Deporte de la Universidá d'Uviéu col patrociniu de Cajastur.

    Más d'una trentena de trabayos del más altu nivel allegaron a la convocatoria del 2013 tomando un ampliu espectru de temátiques dientro del campu de la medicina deportiva. El xuráu fixo públicu'l so fallu colos trés trabayos estremaos esta mañana n'Uviéu.

    L'estudiu Potenciación de la respuesta inmunolóxica a la vacunación n'atletes sometíos a entrenamientu fuerza versus entrenamientu de resistencia alzóse col primer premiu d'esta edición, dotáu con 6.000 euros. L'estudiu demostró que los anticuerpos xeneraos de resultes de la vacunación son tres veces cimeres  n'atletes que desenvolvieren un entrenamientu fuerza en siendo vacunaos. 

    El segundu premiu, dotáu con 3.000 euros, foi pa la investigación de José Antonio López Eficiencia nel exerciciu de sprint en seres humanos, que según l'acta del xuráu apurre "una visión bien completa de la relación ente'l trabayu muscular y l'enerxía emplegada pa realizalo".

    Finalmente, el galardón del tercer premiu  dotáu con 1.500 euros reconoz l'estudiu Entrenamientu n'altitú, rendimientu y tresporte d'osíxenu en nadadores d'élite: ensayu de tres estrategia con grupos paralelos y controles a nivel del mar, obra de Ferrán Rdoríguez. 

    El xuráu d'esta edición tuvo integráu pola vicerrectora d'Investigación y Campus d'Excelencia de la Universidá d'Uviéu, Paz Suárez Rendueles, el director de la Escuela de Medicina del Deporte, Miguel del Valle, Eduardo Iglesias, investigador del Departamentu de Bioloxía Funcional de la Universidá d'Uviéu, Pedro Manonelles, presidente de la Federación Española de Medicina del Deporte, José Fernando Jiménez, Director de la Unidá de Valoración y Diagnósticu del Altu Rendimientu Deportivu de la Facultá de Ciencies del Deporte de la Universidá de Castiella La Mancha y María del Mar Gonzalo, xefa de los servicios médicos de Cajastur.


Buscar