Noticias

  • Un total de 3.893 alumnos van realizar los exames de PAU na Universidá d'Uviéu

    30 de Mayu 2012

    La convocatoria va empezar el llunes 4 de xunu colos exames de Llingua y Lliteratura

    Una imaxe de la PAU del cursu pasáu.

    Un total de 3.893 alumnos formalizaron la so matrícula n'Asturies pa realizar les Pruebes d'Accesu a la Universidá (PAU) que se van desenvolver los díes 4, 5 y 6 de xunu en convocatoria ordinaria y los díes 3, 4 y 5 de xunetu en convocatoria estraordinaria. La cifra amontóse llixeramente, una y bones l'añu pasáu fueron 3.855 los estudiantes qu'allegaron a la convocatoria de xunu.

    Les pruebes van realizarse en trelce sedes partíes ente Uviéu (4), Xixón (3), Avilés (2), Mieres, Ribesella, Cangas y Tapia de Casariego.

    La PAU s'estructura en dos fases: una fase xeneral, obligatoria pa tolos alumnos, que valora'l maduror y maña del estudiante. Si l'alumnu la supera, consigue l'accesu a la Universidá, que non caduca. La segunda fase ye la específica. Ésta ye voluntaria y evalúa conocencies y capacidá de razonamientu n'ámbitos disciplinares rellacionaos colos estudios que pretenden cursase y, amás, dexa ameyorar la nota de la fase xeneral tando especialmente indicada p'aportar a aquellos estudios que tienen llende de places.

    Los exames d'esta primer convocatoria de la PAU 2012 van empezar el llunes 4 de xunu. Los exames de la fase xeneral van empezar a les 15:45 hores cola prueba de Llingua Castellana y Lliteratura. A les 18:00 hores van ser los exames d'Hestoria d'España o Hestoria de la Filosofía. La fase xeneral va terminar la mañana del 5 xunu coles pruebes de Llingua Estranxera a les 9:30 hores y un exame d'una materia de modalidá de segundu de bachilleratu al mediudía.

    La fase específica de PAU, na que los alumnos van esaminar d'un mínimu de dos y un máximu de cuatro asignatures, va empezar el 5 de xunu, a les 15:45 hores colos exames sobre Física, Lliteratura Universal, Dibuxu Artísticu II o Analís Musical. A les 18:00 hores fadrán les pruebes de Dibuxu Técnicu II, Economía de la Empresa, Griegu II o Artes Escéniques.

    El miércoles 6 de xunu tán previstos los exames de Química, Matemátiques Aplicaes a les Ciencies Sociales II, Técniques d'Espresión Gráficu-Plástiques o Hestoria de la Música y de la Danza pa les 9:30 hores. A partir de les 11:45 hores desenvolveránse les pruebes de Matemátiques II, Hestoria del Arte o Electrotecnia.

    Pela tarde a partir de les 15:45 hores realizarán los exames de Bioloxía, Tecnoloxía Industrial II o Xeografía y dende les 18:00 hores van empezar les pruebes de Ciencies de la Tierra y Medioambientales, Llatín II y Diseñu.

    Tola información alrodiu de convocatories, calendariu d'exames, horarios y sedes ta disponible na páxina web de la Universidá.

    Enllaces Rellacionaos:


Buscar