Noticias

  • Un métodu bioinformático prediz la fatiga crónica en pacientes con cáncer de próstata

    21 de Abril 2015

    Matemáticos ya inxenieros de la Universidá d'Uviéu desenvuelven un algoritmu basáu nel analís del xenoma del enfermu que supon una meyora escontra la medicina personalizada.

    Los investigadores de la Universidá d'Uviéu Enrique d'Andrés Galiana y Juan Luis Fernández Martínez

    ¿Cómo pueden les matemátiques ayudar a combatir el cáncer o a solucionar enfermedaes rares? Investigadores de la Universidá d'Uviéu diseñaron un métodu bioinformático que dexa predicir el grau de fatiga crónica n'enfermos con cáncer de próstata sometíos a radioterapia. L'equipu empobináu pol profesor Juan Luis Fernández Martínez definió un algoritmu p'agorar la fatiga crónica en pacientes con cáncer de próstata analizando los sos datos d'espresión xénica. El trabayu, desenvueltu en collaboración con el doctores Leorey N. Saligan del National Institute of Health en Washington, y Stephen T. Sonis, del Brigham and Women's Hospital de Boston y de la Dana-Farber Cancer Institute de la Universidá de Harvard, acaba de ser publicáu na revista Cancer Informatics.

    El grupu de Problemes Inversos, Optimización y Aprendizaxe Automáticu trabaya nel diseñu d'algoritmos y busca de soluciones que dexen adoptar tratamientos personalizaos y embrivir les posibles tosicidaes derivaes de los mesmos. Estos métodos apurren sistemes d'ayuda a tomar de decisiones médiques ya intenten acutar la incertidume sobre'l problema médicu a tratar.

    "La medicina personalizada ye la base del futuru y pallo precisamos ferramientes de predicción fiables basaes nel xenoma de cada paciente, según n'otru tipu de datos médicos d'usu hospitalariu. La nuesa obsesión ye intentar resolver", esplica Juan Luis Fernández Martínez.

    Esti nuevu métodu sirve pa embrivir el síndrome de fatiga crónica n'enfermos con cáncer de próstata por aciu l'analís con firmes xenétiques a pequena escala, alredor d'una trentena de xenes, antes d'alministrar el tratamientu de radioterapia, pa decidir o non la so conveniencia. Conocer de mano qué grau de fatiga crónica podría carecer el paciente abre a los médicos opciones pa poder personalizar en mayor midida los tratamientos y ameyorar la calidá de vida de los enfermos. El síndrome de fatiga crónica afecta de manera progresiva a los sistemes inmunitario, neurolóxicu, cardiovascular y endocrín.

    La revista Cancer Informatics acaba de publicar les resultancies del estudiu, realizáu en collaboración con científicos de la Dana-Farber Cancer Institute de la Universidá de Harvard y del National Institute of Health en Washington.

    El trabayu abre la puerta al estudiu de les bases xenétiques implicaes na fatiga crónica, a la so conexón con distintos tipos de cáncer y con delles enfermedaes neurolóxiques, según al establecimientu de futures dianes terapéutiques.

    La collaboración multidisciplinar ente inxenieros, matemáticos, informáticos, bioquímicos, biólogos y doctores en medicina ye la base p'avanzar escontra los tratamientos personalizaos. Anguaño'l grupu de Problemes Inversos de la Universidá d'Uviéu tamién collabora n'otros proyectos biomédicos, tales como l'estudiu de la leucemia linfática crónica, el linfoma de Hodgkin, el síndrome nefrótico, el cáncer d'entrellenzu, el cáncer de pulmón, los cánceres gástricos y de colon, o los cánceres de mama triplemente negativos. Apocayá esti grupu d'investigación dio un importante pasu pal establecimientu de collaboraciones na busca de tratamientos d'enfermedaes rares.

    Artículu

    Supervised Classification by Filter Methods and Recursive Feature Elimination Predicts Risk of Radiotherapy-Related Fatigue in Patients with Prostate Cancer

    http://www.la-press.com/supervised-classification-by-filter-methods-and-recursive-feature-elim-article-a4528-metrics

    Grupu de Problemes Inversos, Optimización y Aprendizaxe Automáticu

    Juan Luis Fernández Martínez, Enrique Juan de Andrés Galiana, María Zulima Fernández Muñiz, Doina Ana Cernea Corbeanu, Luis Mariano Pedruelo González, José Luis García Pallero, y Juan Carlos Beltrán Vargas.

    Imaxes:


Buscar