Noticias

  • Un investigador de la Universidá d'Uviéu recibe una ‘Starting Grant', l'ayuda europea más prestixosa pa nuevos talentos

    12 de Xunetu 2011

    Ángel Manteca foi escoyíu pol Conseyu Européu d'Investigación y va recibir 1,3 millones d'euros pa desenvolver, mientres cinco años, un proyectu rellacionáu col estudiu de les bacteries Streptomyces, que tán na base de munchos antibióticos y que tienen un altu interés industrial.

    Ciclu de desenvolvimientu de les bacteries Streptomyces
    Ángel Manteca, investigador del departamentu de Bioloxía Funcional (Facultá de Medicina y Ciencies de la Salú) foi escoyíu pol Conseyu Européu d'Investigación (ERC nes sos sigles n'inglés) pa recibir una ayuda del programa ‘Starting Grant', dirixíu a sofitar a nuevos talentos ya investigaciones novedoses y de vanguardia.

    Esta beca ye una de les más importantes nel ámbitu européu, tantu pola so dotación como pol so prestíu. Ángel Manteca va percibir 1,3 millones d'euros pa desenvolver un proyectu rellacionáu coles bacteries Streptomyces a lo llargo de cinco años, daqué que "supon una estabilidá que me dexará formar el mio propiu grupu d'investigación y poder desenvolver la llínea d'investigación con medios abondos", afirma'l científicu.

    El proyectu escoyíu, tituláu ‘Caracterización biomolecular de la diferenciación de Streptomyces y la so relación cola producción de metabolitos secundarios', enmárcase dientro de la área de ciencies de la vida y consiste nuna investigación básica centrada nel estudiu del ciclu de desenvolvimientu de les bacteries Streptomyces, que tienen gran interés industrial so una perspectiva bien novedosa. "Les Streptomyces son unes bacteries con un ciclu de desenvolvimientu bien complexu, paecíu al de los hongos", esplica Manteca, "que producen el 80% de los metabolitos secundarios", esto ye, compuestos bioactivos d'interés en biomedicina como antibióticos, antitumorales, inmunodepresores, antifúngicos, ente otros munchos. Estes bacteries sirven, amás, de modelu pa entender l'orixe evolutivu de procesos como la apoptosis celular.

    El Programa Starting ye una convocatoria de proyectos europeos dientro del subprograma IDEAS del VII Programa Marco, que financia la investigación n'Europa. Na modalidá Starting, financia'l desenvolvimientu d'investigación de vanguardia realizada por equipos individuales, ufiertando nueves oportunidaes pa investigadores xóvenes más brillosos y creativos. Esti programa recibe cada añu miles de solicitúes de toa Europa. En 2010 financiáronse 400 proyectos, de los que 23 correspondíen a investigadores españoles. Este ye'l segundu proyectu Starting Grant de la Universidá d'Uviéu, que se suma al que recibió la investigadora Heather Stoll, de la Facultá de Xeoloxía, en 2009.


Buscar