Noticias

  • Un investigador de la Universidá d'Uviéu collabora nun trabayu sobre nueves dianes terapéutiques nel cáncer

    26 de Xunu 2012

    Guillermo García Santos ye coautor del artículu recoyíu pola revista Nature Medicine sobre'l papel que los exosomas xueguen nel desenvolvimientu de la metástasis y el so posible bloquéu

    Guillermo García Santos -a la derecha- xuntu al doctor Héctor Peinado, autor principal del artículu.

    La prestixosa revista Nature Medicine recueye nel so númberu del pasáu mes de mayu un trabayu cofirmado pol investigador asturianu Guillermo García Santos, llicenciáu pola Universidá d'Uviéu y premiu de la Fundación Universidá d'Uviéu n'Investigación Aplicada nel añu 2010.

    García Santos desenvuelve'l so llabor investigador nel Well Cornell Medical College de Nueva York y l'investigación publicada realizóse en collaboración col Memorial Sloan-Kattering Cancer Center de Nueva York, dos de les instituciones con un mayor prestíu investigador nel campu de la biomedicina n'EEXX.

    L'artículu tituláu Melanoma exosomes educate bone marrow progenitor cells toward a pro-metastatic phenotype through MET esplica por qué los exosomas podríen ser consideraos les nueves dianes terapéutiques pal cáncer. La investigación abre la puerta a que nun futuru un simple analís de sangre dexe diagnosticar y prevenir l'apaición de la metástasis en tumores de melanoma.

    El grupu d'investigación col que trabaya Guillermo García Santos estudió'l compartimientu de los exosomas dientro de la riega sanguínea, cómo se xeneren y cómo participen na progresión de los tumores. Los sos esperimentos pudieron determinar qu'estes microvesículas xeneren redolaes favorables pal desenvolvimientu de la metástasis.

    L'estudiu ufierta datos esperanzadores sobre'l bloquéu de los exosomas tumorales, que podríen ser consideraos como nueves dianes terapéutiques en cáncer pa tratar de bloquiar la progresión tumoral y la metástasis.

    Guillermo García Santos ye Doctor en Bioloxía pola Universidá d'Uviéu y trabayó nel Institutu d'Oncoloxía del Principáu d'Asturies (IUOPA). Nel añu 2010 la Fundación Universidá d'Uviéu concedió-y el so premiu n'Investigación Aplicada, gracies al cual pudo establecer bases pa una collaboración activa nel llaboratoriu del doctor David Lyden en Nueva York, onde agora desenvuelve'l so llabor investigador gracies a una ayuda del programa Clarín del Principáu d'Asturies.

    Imaxes:


Buscar