Noticias

  • Un estudiu revela qu'un aumentu fayadizu de pesu nel embaranzu amenorga la tresmisión de contaminantes al fetu

    19 de Payares 2014

    Un equipu de la Universidá d'Uviéu, dirixíu pola doctora Adonina Fernández Tardón, analiza la esposición a ciertos contaminantes altamente resistentes mientres la xestación

    L'equipu d'investigación de la doctora Tardón estudia agora los efectos que los compuestos organoclorados tienen nos naciellos y cómo puede afectar a la so crecedera.

    Un estudiu realizáu ente 482 madres asturianes y los sos ñácaros por investigadores de la Universidá d'Uviéu constató que la ganancia de pesu maternu mientres l'embaranzu xuega un papel importante na esposición prenatal del fetu a compuestos organohalogenados. Asina, los espertos repararon que les muyeres que cumplen les directrices de ganancia de pesu mientres la xestación pueden amenorgar l'acumuladura de contaminantes orgánicos persistentes nos naciellos, sicasí aquelles madres que nun aumenten el pesu abondu tresmiten una mayor concentración.

    Los compuestu organohalogenados (OHs) son contaminantes altamente resistentes, tóxicos y lipofílicos. Tán presentes en munchos plásticos, pesticidas, aislantes y tamién nel aire. La esposición a tales contaminantes mientres el desenvolvimientu fetal puede afectar negativamente a la función del tiroides y podría, poro, aumentar el riesgu d'efectos adversos pa la salú mientres la infancia. Anque la mayoría d'estos compuestos fueron oxetu d'estudiu mientres años, la so tresferencia mientres la xestación resulta inda bastante desconocida.

    L'equipu empobináu pola doctora Adonina Tardón García, xefa de la Unidá d'Epidemioloxía del Cáncer del Institutu Universitariu d'Oncoloxía del Principáu d'Asturies (IUOPA), evaluó la esposición prenatal a distintes families de OHs y la so relación cola ganancia de pesu maternu mientres l'embaranzu y con otres característiques sociu-demográfiques rellacionaes. Pa facelo llográronse amueses del sueru de les madres, el sangre del gordón umbilical y la llibradura p'analizar les concentraciones de OHs en caúna d'elles. Los espertos tamién analizaron les relaciones de concentración ente les amueses empareyaes.

    Los trabayos del equipu de la doctora Tardón enmárquense dientro del proxectu Infancia y Mediu Ambiente (INMA), financiáu pol Institutu de Salú Carlos III. Les prestixoses revistes especializaes Environ Health Perspect y Enviroment International publicaron yá les resultancies del estudiu efectuáu na Universidá d'Uviéu.

    Les pruebes realizaes ente 482 madres asturianes y los sos ñácaros revelaron que tolos naciellos presentaben niveles detectables d'estos contaminantes

    Ente 2004 y 2008 un total de 482 madres asturianes y los sos naciellos fueron sometíes al estudiu. L'equipu analizó nes amueses tomaes en sangre, gordón umbilical y llibradura les concentraciones esistentes de distintes Compuestos Orgánicos Persistentes (organacloruros, policlorobifeniles y policlorobifeniles éter). Les resultancies revelaron que tolos naciellos presentaben niveles detectables de contaminantes organohalogenados. La concentración más elevada correspondió al metabolito principal del insecticida DDT, que foi atopáu nel 99,7 per cientu de los ñácaros. Polo xeneral, les concentraciones de compuestos organoclorados topaes fueron más altes nel sueru de la madre que na llibradura y el sangre del gordón umbilical.

    A la de establecer una relación ente la ganancia de pesu nel embaranzu y la tresmisión d'esti tipu de compuestos los espertos repararon que les madres que ganaron menos pesu mientres l'embaranzu, tresfirieron más compuestos organohalogenados a los sos fíos nel momentu de nacer. La investigación tomó como referencia pa una fayadiza ganancia de pesu mientres la xestación les directrices marcaes pol Institute of Medicine (IOM).

    L'estudiu conclúi que la vida prenatal ye la fase del desenvolvimientu humanu más sensible a los contaminantes medioambientales, y una temprana esposición a los Compuestos Orgánicos Persistentes puede aumentar el riesgu a carecer problemes de salú mientres la infancia.

    L'equipu d'investigación de la doctora Tardón estudia agora los efectos que los compuestos organoclorados tienen nos naciellos y cómo puede afectar a la so crecedera. Les llínees d'investigación abiertes inclúin l'estudiu del so impactu nel desenvolvimientu hormonal de los pequeños y tamién la so posible interferencia na capacidá d'absorción de vitamina D. Finalmente, el trabayu analiza si esiste o non un venceyu ente la obesidá infantil y l'esistencia nel organismu de compuestos orgánicos persistentes.

    Equipu d'investigación

    • Adonina Tardón García (Investigadora principal)
    • Ana Fernández Somoano
    • Ana Souto García
    • Cristina Arias
    • Isolina Riaño (Hospital San Agustín)
    • Cristina Rodríguez Dehei (Hospital San Agustín)

Buscar