Noticias

  • Un estudiu rastrexa la buelga xenética del pueblu asturianu

    11 de Abril 2014

    La secuenciación del ADN dexó reparar una marcada estructuración xenética que coincide coles fronteres ente los asentamientos ástures de la dómina prerromana

    Una romería al pie de un molín tradicional en Candás nel añu 1917. Llicencia Creative Commons

    L'ADN de los asturianos caltien entá güei buelgues xenétiques de dómines remotes. Una investigación desenvuelta na Universidá d'Uviéu acredita que les antigües fronteres marcaes polos asentamientos ástures prerromanos dexaron el so rastru d'ADN nes poblaciones actuales. Los analises realizaos en 61 conceyos asturianos dexaron detectar una marcada estructuración xenética n'Asturies que s'estrema de la que caracteriza otres zones de la península. Dientro de la rexón apréciase amás la presencia de llinaxes xenéticos distintos nos estremos oriental y occidental, que les sos poblaciones amuesen nicios de diferenciación xenética ente elles y con al respective de les centrales.

    El porqué d'esa diferenciación xenética ente poblaciones atopa una esplicación nes barreres de l'accidentada orografía asturiana. Los ríos Sella y Navia marquen llendes territoriales puramente xeográficos, pero que se ven reforzaos por una barrera sociopolítica al coincidir dambos caudales coles fronteres esistentes ente les antigües tribus ástures que poblaben eses zones en dómina prerromana.

    El trabayu arrexuntó 486 amueses d'individuos de 61 conceyos asturianos que los sos padres y güelos vivieren na mesma zona xeográfica

    L'estudiu desenvueltu pol doctor Antonio Fernández Pardiñas llevose a cabu nel Departamentu de Bioloxía d'Organismos y Sistemes y tuvo dirixíu por Belén López Martínez y Eva García Vázquez. Les conclusiones llograes fueron espuestes apocayá na llectura de la tesis doctoral que recueye toa esta investigación realizada na área d'antropoloxía física.

    El trabayu de campu supunxo la escoyeta d'un total de 486 amueses tomaes en 61 conceyos asturianos a individuos que los sos güelos vivieron na mesma zona xeográfica. Les pruebes xenétiques realizaes supunxeron la secuenciación del ADN mitocondrial (marcador xenéticu tresmitíu pola madre) de 429 d'elles y 192 analises xenéticos del cromosoma Y (marcador xenéticu tresmitíu pol padre). L'amuesa asturiana integrase nuna base de datos con más de 9.500 referencies procedentes d'otres poblaciones d'Europa y África del Norte p'atopar patrones xeográficos a escala local, rexonal y europea. Los enclinos detectaos nesa comparanza estadística dexen rellacionar a la población antigua d'Asturies cola d'otres rexones de la llamada zona Franco-Cantábrica.

    Los datos llograos al secuenciar l'ADN mitocondrial y el cromosoma Y revelen una coincidencia casi total ente dambos marcadores xenéticos, lo cual suxure un orixe antiguu de les subpoblaciones asturianes, basáu n'agrupaciones de tipu familiar relativamente aisllaes ente sigo y con una movilidá similar pa dambos sexos.

    Los afayos d'esta tesis doctoral sobre l'antropoloxía física del pueblu asturianu fueron publicaos por prestixoses revistes científiques como American Journal of Physical Antropology, Journal of Human Genetics o PLoS ONE.

    Imaxe de portada

    Imaxe d'una romería popular celebrada nes cercaníes d'Uviéu a principios del sieglu XX. Semeya del arquivu personal de Fernando de la Puente.


Buscar