Noticias

  • Un estudiu demuestra que l'actividá física y la estimulación ambiental ameyoren el funcionamientu cognitivu nel avieyamientu

    23 de Xineru 2014

    Investigadores de la Universidá d'Uviéu descifren los cambeos qu'esperimenta'l celebru en siendo aguiyáu afechiscamente.

    D'esquierda a derecha, Marcelino Cuesta, Patricia Sampedro, Clara Zancada, Laudino López, Piedad Burgos, Begoña Díaz y Azucena Begega.

    L'actividá física frecuente y moderada, según la estimulación ambiental retrasen el deterioru cognitivu que trai consigo l'avieyamientu. Investigadores del Departamentu de Psicoloxía de la Universidá d'Uviéu confirmaron que l'exerciciu y una fayadiza estimulación cognitiva, sensorial, motora y social dexa al celebru funcionar d'una forma más eficiente, con un menor consumu enerxéticu mientres l'alquisición de pruebes de memoria.

    El trabayu del equipu investigador fízose nel llaboratoriu de Neurociencies, dirixíu pol Dr. Jorge Luis Arias (Facultá de Psicoloxía, INEUROPA), y dexó reparar los mecanismos cerebrales que subyacen a estes intervenciones en modelos animales (aguarones Wistar d'edá avanzada).

    La observación realizada n'aguarón Wistar va dexar desenvolver fármacos qu'asonsañen los efectos d'esti tipu d'intervenciones, según ellaborar programes de estimulación pa persones mayores que dexen amenorgar la gran prevalencia de llocures como l'Alzheimer o'l Parkinson.

    Los investigadores traten de descifrar los mecanismos neurobiolóxicos pa contribuyir nel futuru al diseñu de fármacos ya intervenciones conductuales más efectives contra enfermedaes como l'Alzheimer o Parkinson. "Al determinar qué cambeos esperimenta'l celebru en siendo sometíu a estimulación ambiental o actividá física podemos intentar diseñar fármacos o programes de estimulación pa persones mayores qu'asonsañen los mesmos efectos y dianes cerebrales", esplica Patricia Sampedro, una de les investigadores del equipu, que prepara la so tesis doctoral sobre los efectos preventivos de l'actividá físico y mental.

    Dalgunos de los trabayos d'esti equipu amosaron cambeos positivos nes célules de sofitu a les neurones, los astrocitos, naquellos aguarones que fueron sometíos a esti tipu d'intervenciones. Amás, comprobóse qu'estos animales reaccionen con menos ansiedá y avezar con mayor rapidez a ambientes nuevos.

    Los efectos del cambéu na condición de vivienda

    Los investigadores trabayaron con dellos grupos d'animales que diferíen na so condición de vivienda nel llaboratoriu. Parte d'ellos son treslladaos a xaules grandes dotaes de numberosos estímulos visuales y sensoriales que semanalmente modificanse pa valorar les reacciones al cambéu y l'esploración de la novedá. Amás, los animales realicen exerciciu aeróbico mientres 20 minutos al día con períodos de descansu pa evitar niveles elevaos de estrés.

    Tres dos meses siguiendo esti programa de estimulación realícense pruebes de memoria a los aguarones aguiyaos y a aquélles que permanecieron na xaula estándar de llaboratoriu. Les resultancies del estudiu amuesen que les primeres son capaces d'adquirir más rápido y con menos erros una prueba de memoria, al empar qu'el so celebru demanda menos enerxía mientres la xera.

    Otru de los afayos d'esti grupu diose nes célules de sofitu a les neurones, los astrocitos, de los aguarones aguiyaos. Éstos presenten ramificaciones más llargues y complexes que dexen compensar los déficits qu'asoceden nes conexones neuronales por causa de la edá. L'adaptación d'estos animales a nuevos ambientes ye tamién más rápida y menos estresante, lo cual podría esplicase pol aumentu atopáu na espresión de receptores de glucocorticoides que son los encargaos de tornar la exa del estrés.

    Equipu investigador

    • Azucena Begega Losa
    • Patricia Sampedro Piquero
    • Clara Zancada Menéndez
    • Marcelino Cuesta Izquierdo
    • Laudino López Álvarez
    • Piedad Burgos (técnico de laboratorio)
    • Begoña Díaz (técnico de laboratorio)

    Enllaces Rellacionaos:


Buscar