Noticias

  • Un estudiu demuestra'l potencial d'un compuestu d'orixe vexetal pa combatir la infertilidad acomuñada a la obesidá

    19 de Febreru 2015

    Investigadores de la Universidá d'Uviéu prueben les cualidaes del resveratrol p'ameyorar ciertes anomalíes metabóliques y contribuyir al caltenimientu de la reserva ovárica nes muyeres con sobrepesu

    D'esquierda a derecha, Elena Díaz, Tino González, Ana Alonso y Estefanía Cabello n'unu de los llaboratorios de la Facultá de Medicina y Ciencies de la Salú.

    Investigadores de la Universidá d'Uviéu probaron les propiedaes del resveratrol, una sustanza químico d'orixe vexetal, como tratamientu potencial de la infertilidad acomuñada a la obesidá. Les resultancies del trabayu del equipu lideráu pol doctor Celestino González (Departamentu de Bioloxía Funcional) fueron publicaos pola prestixosa revista Fertility and Sterility y apunten les potencialidaes d'esti polifenol pa combatir ciertes anormalidaes metabóliques que compliquen l'ésitu de la reproducción asistida. El resveratrol ye un polifenol d'orixe vexetal, presente principalmente na superficie de la piel de la uva, que los sos efectos antiosidantes y protectores frente al avieyamientu celular yá fueron probaos.

    Los esperimentos realizaos con modelos animales reflexaron conclusiones relevantes a la d'ameyorar les mires d'ésitu de los tratamientos de estimulación ovárica emplegaos en procedimientos de reproducción asistida. Nel casu de les muyeres con sobrepesu, el resveratrol tendría propiedaes qu'ameyoren ciertes anormalidaes metabóliques que suelen dir asociaes a la obesidá y atrabanquen la concepción como son la resistencia a l'acción de la insulina, el hiperandrogenismo o un estáu proinflamatorio. Amás, dosis baxes d'esta sustanza ayudaríen a caltener la reserva ovárica, evitando la perda temprana de folículos ováricos, en muyeres grueses que se someten a técniques de reproducción asistida.

    La prestixosa revista Fertility and Sterility publicó'l trabayu que confirma les cualidaes del polifenol p'ameyorar les tases d'ésitu de los tratamientos de reproducción asistida.

    Les pruebes realizaes nel llaboratoriu estremaron per un sitiu a mures infértiles y gruesos y, por otru, a mures con un pesu normal y ensin problemes reproductivos. Nel casu de los segundos les dosis baxes de resveratrol sirvieron pa potenciar la respuesta ovárica, lo que supondría una tasa más alta d'ésitu nes terapies de reproducción asistida.

    El venceyu ente obesidá y esterilidá

    Ye común que les muyeres con sobrepesu o obesidá presenten distintes alteraciones metabóliques, tales como diabetes tipu II, hiperandrogenismo o un estáu inflamatorio crónicu. Eses patoloxíes tienen un impactu negativu sobre la fertilidá femenina y traen, en munchos casos, una baxa respuesta a la estimulación ovárica, llogrando peores resultancies nos tratamientos de reproducción asistida.

    Los esperimentos desenvueltos con mures de llaboratoriu gruesos y infértiles demostraron que'l tratamientu con resveratrol tien efectos antidiabéticos y antiinflamatorios, menguando los niveles sanguíneos d'insulina y distintes citoquines pro-inflamatorias nel texíu adiposo. Coles mesmes, amenorga l'escesu d'andróxenos llibres en sangre, responsables en gran parte del fallu ováricu, y de los problemes reproductivos asociaos al sobrepesu. Tratase de la primer vegada que se demuestra qu'esti polifenol tien efectos in vivo antihiperandrogénicos y que, por tanto, puede restaurar los niveles de testosterona a la normalidá.

     

    El grupu de control utilizáu nel llaboratoriu taba formáu por mures non gruesos y ensin problemes reproductivos. Nel so casu, el tratamientu produció un aumentu significativu na respuesta ovárica al recoyer más ovocitos porque'l resveratrol potencia l'efectu de les gonadotropines utilizaes nel protocolu de estimulación ovárica. Esta combinación podría ameyorar sustancialmente la resultancia del tratamientu de estimulación al llograr mayor númberu d'embriones a partir de la fecundación in vitro de los ovocitos. Les conclusiones del estudiu tamién recueyen les propiedaes de resveratrol a la d'embrivir los riesgos que trai l'alministración d'altes dosis d'hormones emplegaes na inducción de la superovulación.

    Títulu del artículu

    Effects of resveratrol on ovarian response to controlled ovarian hyperstimulation in ob/ob mice

    Firmantes del artículu

    Estefanía Cabello, Pablo Garrido, Javier Morán, Carmen González del Rey, Plácido Llaneza, David Llaneza-Suárez, Ana Alonso, Celestino González

    Grupu d'investigación en Fisiopatología del avieyamientu y la fertilidá femenines

    Celestino González, Abel Gayo, Lourdes Sánchez, Ignacio Arnott, Javier Morán, Pablo Garrido, Elena Díaz, María del Carmen González del Rey, Plácido Llaneza y Ana Alonso.

    Imaxes:

    Vídeos Rellacionaos:


Buscar