Noticias

  • Un estudiu de la Universidá d'Uviéu radiografía los vezos alimentarios de los españoles

    07 de Febreru 2014

    El trabayu de los investigadores del grupu de Socioloxía de l'Alimentación confirma que cada vez comemos menos fuera de casa y que la crisis camudó más los vezos de compra que la dieta diaria.

    Según l'estudiu, los españoles siguimos una dieta rica n'alimentos frescos lo cual implica que se fai la compra con muncha frecuencia y cada vez más en comercios de proximidá.

    ¿Qué tal comemos el españoles? ¿Qué impactu tuvo la crisis nos nuesos vezos alimentarios? ¿Cuálos son les razones que nos impulsen a faer dieta? Son dalgunes de les entrugues a les que da respuesta l'estudiu Vezos alimentarios de los españoles, realizáu pol grupu d'investigación de Socioloxía de l'Alimentación de la Universidá d'Uviéu. El trabayu, patrocináu por CAPSA, acaba de ser publicáu pol Ministeriu d'Agricultura, Alimentación y Mediu Ambiente.

    La encuesta realizada a más de 1.500 persones en tol país revela que los españoles siguimos una dieta rica n'alimentos frescos lo cual implica que se fai la compra con muncha frecuencia y cada vez más en comercios de proximidá. L'enfotu de los consumidores nesti tipu d'establecimientos a la d'adquirir los productos perecederos ye mayor que la qu'amuesen escontra les grandes cadenes. L'apreciu escontra los productos locales y la cercanía d'esti tipu de tiendes son factores que xueguen a favor de los comercios de barriu a la de faer la compra diaria.

    La crisis económica tamién dexa buelga nos vezos alimentarios. La investigación desenvuelta pol equipu que dirixe la profesora Cecilia Díaz confirma que cada vez comemos menos fuera de casa y que'l perfil de quien lo fai por motivos de trabayu en díes llaborables ye claramente masculín. Les comíes fora del llar caltienen un componente social y d'ociu y 3 de cada 5 encuestaos afirmen que siguen comiendo fora de casa mientres la fin de selmana. Los horarios llaborales y d'estudios obliguen a una parte importante de la población a comer nos sos llugares de trabayu per selmana, ente esti grupu detectóse una medría de númberu de persones que se lleven la comida preparada de casa, especialmente nel casu de los estudiantes.

    Una de les grandes diferencies ente España y el restu d'Europa son los horarios. La duración de la comida ye enforma mayor qu'otros países por causa de los horarios llaborales y tamién del componente social que lleven apareyáu les comíes y cenes. Los investigadores señalen qu'un cambéu d'horariu de 9 a 5 hores, el más común n'otros países, supondría modificar "el calter de comida principal que tien la comida de mediudía xenerando tresformamientos, tantu na composición como nel calter de sociabilidá que tien la comida pa el españoles". L'aumentu del númberu de llares unipersonales tamién contribúi a perder esi componente social.

    Vivir a dieta, estética o salú

    L'estudiu realizáu dende'l Departamentu de Socioloxía de la Universidá d'Uviéu constata que 1 de cada 4 españoles fai dieta y dellos la metá almite faela pa perder pesu, ente que un 30 per cientu fácela por prescripción médica. La diabetes, el colesterol y l'hipertensión son les principales dolencies qu'obliguen a los pacientes a adoptar una alimentación más saludable.

    Los espertos sollerten de que "la presión pola delgadez puede derivar nuna medicalización de l'alimentación. El vezu estendíu ente la población de tar a dieta puede ser un caldu de cultivu aparente pa les técniques o productos milagro".

    Polo xeneral, la mayor parte de la población reconoz evitar el consumu de ciertos alimentos que perciben como pocu saludables. Ye'l casu de los dulces, los precocinaos, les bébores azucaradas o la mantequilla. Sicasí esa moderación nun s'aplica al pan, les pataques o la lleche.

    Les crisis alimentaries como la de les vaques lloques y la del pepinu pasaron factura al enfotu de los consumidores. Sicasí, los científicos, les autoridaes sanitaries y les asociaciones de consumidores caltienen una alta credibilidá ente la población a la d'encarar una posible situación de riesgu alimentario.

    So una perspectiva de xéneru, el trabayu confirma que son les muyeres les que mayoritariamente encárguense de cocinar nos llares españoles, un 77,8 per cientu frente al 22,2 per cientu d'homes. Ente los varones, los que más s'averen a los fogones son los universitarios d'ente 30 y 40 años. Los datos sofiten que sían les muyeres quien tean más implicaes a la de siguir una alimentación saludable.

    Equipu investigador

    • Cecilia Díaz Méndez
    • Isabel García Espejo
    • Rodolfo Gutiérrez Palacios
    • Amparo Novo Vázquez

Buscar