Noticias

  • Un estudiu acredita l'amenorgamientu del tamañu y l'edá media de los salmónidos n'Asturies

    05 de Payares 2014

    Investigadores de la Universidá d'Uviéu compararon restos paleolíticos con exemplares actuales y constaten un descensu notable de la talla media

    Restos de salmónidos del Paleolíticu, pertenecientes a la colección del Muséu Arqueolóxicu d'Asturies

    Investigadores de la Universidá d'Uviéu constataron l'amenorgamientu del tamañu y l'edá media de los salmónidos nativos d'Asturies dende'l Paleolíticu hasta los nuesos díes. La comparanza de restos arqueolóxicos y exemplares actuales de salomones y truches dexó determinar qu'el so tamañu ye menor y la so edá media más baxa debíu al aumentu de la temperatura, la continua actividá pesquera y la fragmentación de hábitats que vien produciéndose a lo llargo de los sieglos.

    El trabayu, enmarcáu dientro de l'actividá del Observatoriu Marín d'Asturies, foi realizáu por investigadores de los departamentos de Bioloxía Funcional y Xeoloxía de la Universidá d'Uviéu en collaboración con científicos de la Universidá de Swansea (Reinu Xuníu). L'artículu que recueye les conclusiones del estudiu foi publicáu en Royal Society Open Science y referenciáu pola páxina web de la revista National Geographic.

    La catedrática de Xenética, Eva García Vázquez, y el xeólogu Pablo Turrero estudiaron restos de salmónidos del Paleolíticu, pertenecientes a la colección del Muséu Arqueolóxicu d'Asturies, y comparáronlos con exemplares pescaos na actualidá nel Principáu. "En términos xenerales apréciase un amenorgamientu significativu del tamañu mediu d'estes especies que diría de los 50 a los 33 centímetros", esplica Pablo Turrero.

    La midida de les vértebres dexa a los especialistes determinar ecuaciones que rellacionen el tamañu d'estes estructures ósees col llargor total del individuu, reparando gracies a estos cálculos cómo se produz esi amenorgamientu de talla. Los estudios llevaos a cabu tamién revelen cambeos nel tiempu promediu que pasen los individuos migradores nel mar que baxa de manera notable, ente que la duración de la so etapa d'agua duce caltiense estable. "Reparemos que cada vez vuelven antes del mar y por tanto, son exemplares más pequenos", conclúi Turrero.

    L'actividá pesquera que se lleva a cabu dende fai milenios podría faer esmornia nes poblaciones al retirar los exemplares de mayor tamañu, que son los más acobiciaos, de la competencia pola reproducción. Asina, los exemplares que se reproducen son cada vez más pequenos y más nuevos, provocando que les pieces de gran talla sían cada vez menos frecuente.

    L'aumentu sosteníu de la temperatura y l'intensa actividá pesquera condicionen la evolución de les especies afectaes

    L'aumentu progresivu de la temperatura de l'agua ye otra esplicación que los científicos argumenten pa xustificar esti descensu de la talla media, siquier nel casu concretu de los salmones, una y bones la mesma bioloxía d'esta especie fai que crezan peor n'agües más templaes. Finalmente, la contaminación esistente nos caudales de los ríos supon otra de les grandes diferencies col hábitat nel que vivieron los exemplares del Paleolíticu y un posible factor determinante pa esplicar los cambeos de tamañu y edá media.

    L'Observatoriu Marín d'Asturies, impulsáu pol Campus d'Excelencia Internacional, configúrase como una Agrupación Estratéxica de Grupos d'Investigación na que participen grupos y equipos multidisciplinares de la Universidá d'Uviéu cola cuenta d'axuntar y facilitar la información sobre'l mar n'Asturies a la comunidá científica, a los ciudadanos, a los profesionales y a les alministraciones.

    Imaxe banner de portada

    A la izquierda la vértebra d'un exemplar de salmónidu actual, a la derecha una de les vértebres arqueolóxiques calteníes dende'l Paleolíticu y utilizaes nel estudiu.

    Imaxes:


Buscar