Noticias

  • Un equipu internacional analiza la evolución ambiental de la Antártida

    30 de Xunetu 2014

    La Universidá d'Uviéu participa nel proyectu HOLOANTAR, qu'evalúa la incidencia del cambéu climáticu sobre'l continente xeláu al traviés del estudiu de les zones deglaciades.

    Llegada de Marc Oliva (esquierda) y Jesús Ruiz (derecha) a la Antártida, al aerodromo de Frei

    Solo'l 0,4 per cientu de la Antártida ta llibre xelu. Les escases árees deglaciades zarren una biodiversidá única afecha a un mediu desaxeradamente duru, amás de cuntar con numberosos cuerpos llacustres, que constitúin pervalibles rexistros pa reconstruyir la evolución ambiental del continente xeláu mientres los últimos milenios, según la variabilidá climática que traxo estos cambeos. La Universidá d'Uviéu forma parte d'un equipu de científicos de Portugal, España, Brasil y Uruguai que trabayen pa describir esta variabilidá climática nel proyectu internacional HOLOANTAR (Holocene Environmental Change in the Maritime Antarctic. Interactions between permafrost and the lacustrine environment).

    L'investigador del Departamentu de Xeografía de la Universidá d'Uviéu, Jesús Ruiz Fernández, trabaya nel equipu multidisciplinar que pretende esplicar los principales cambeos qu'esperimentó la Antártida marítima ya intentar determinar cuálos fueron naturales y qué parte inducida pol home. Los trabayos de HOLOANTAR, coordináu pol investigador Marc Oliva de la Universidá de Lisboa, faense na península de Byers, na parte occidental de la Isla Livingston, una zona na qu'esisten unos 110 llagos que s'aniciaron a partir del retrocesu del glaciar Rotch.

    El profesor Jesús Ruiz, investigador del Departamentu de Xeografía de la Universidá d'Uviéu, ocupase de realizar la cartografía detallada y l'estudiu xeomorfolóxicu de la península de Byers, asitiada na Isla Livingston.

    Llograr una cartografía detallada de les cuenques llacustres de Byers y estudiar la so dinámica xeomorfolóxica son los oxetivos concretos del profesor Ruiz Fernández dientro del equipu. Hasta'l momentu desenvolviéronse dos campañes de trabayu de campu sobre'l terrén pa recoyer amueses de los sedimentos de dellos llagos y tratar de caracterizar el comportamientu térmicu del llamáu permafrost, suelu permanentemente xeláu que controla la dinámica xeomorfolóxica actual de les árees llibres de xelu glaciar y que constitúi un escelente indicador dende'l puntu de vista climáticu.

    Les primeres resultancies de los estudios na zona dexaron constatar, por casu, la rápida retirada del glaciar Rotch nes últimes décades a consecuencia del calentamientu climáticu. Más d'un 17 per cientu de la península de Punta Elefante, una zona ensin estudiar hasta agora cercana a Byers, formóse ente 1956 y 2010. Amás, los investigadores pudieron comprobar que más d'un 11 per cientu de la área apocayá deglaciada en Punta Elefante esperimentó diversos tipos de movimientos en masa, como deslizamientos, fluxos de folla y fluxos de derrubios. Estes altes tases de tresporte de materiales son mesmes d'árees apocayá deglaciadas y escayen progresivamente col tiempu hasta algamar los valores normales d'árees non glaciades.

    Dende la segunda metá del sieglu pasáu rexístrase un enclín al calentamientu climáticu en tola rexón de la Península Antártica. Esta tasa de calentamientu haise cuantificado en 0,5 ºC/década, lo que constitúi unu de los mayores aumentos de temperatura que se ta rexistrando na Tierra.

    Les dataciones y analises de llaboratoriu de los sondeos llograos nos llagos van dexar deducir una cronoloxía y una evolución ambiental detallada de la Antártida marítima mientres los postreros 11000 años. Pela so parte, la presea instalada por HOLOANTAR na península de Byers pa la monitorización de la temperatura del aire, el permafrost y l'espesura de la cubierta nival, va dexar llograr al mediu plazu pervalibles resultaos sobre la incidencia que'l cambéu climáticu ta teniendo na Antártida marítima. Les primeres conclusiones reparaes yá fueron presentaes en prestixosos foros internacionales y fueron unviaes a les revistes especializaes de mayor impactu.

    La próxima campaña de HOLOANTAR ta prevista pa xineru de 2015 y va centrase na realización de perfiles geoeléctricos pa la caracterización del permafrost, la instalación d'estaques y midíes de DGPS y la realización de trabayos de tipu xeoecológico a lo llargo de la península.

    Publicaciones derivaes del proyectu HOLOANTAR
    • Artículos en revistes internacionales
      Oliva, M. & Ruiz-Fernández, J. (en revisión): Paraglacial dynamics in a maritime Antarctic permafrost environment (Elephant Point, Livingston island).
      Earth Surface Processes and landforms.
      Oliva, M. & Ruiz-Fernández, J. (en revisión): Geomorphological processes and frozen ground conditions in Elephant Point (Livingston Island, South Shetland Islands, Antarctica).
      Geomorphology.
      Ruiz-Fernández, J. & Oliva, M. (en redacción): Geomorphological features in Cerro Negro hill (Byers Peninsula, Livingston Island, Antarctica) and palaeoenvironmental implications.
      Geografia Fisica y Dinamica Quaternaria.
    • Comunicaciones aceptaes en congresos:
      Geo-ecological units in Elephant Point Peninsula (Livingston Island, Maritime Antarctica).
      XXXIII SCAR Meetings and Open Science Conference, Scientific Committee on Antarctic Research (Auckland, Nueva Zelanda, 22 d'agostu a 3 de setiembre de 2014).
      Geomorphological processes in the ice-free area of Elephant Point (Livingston island, South Shetland).
      XXXIII SCAR Meetings and Open Science Conference, Scientific Committee on Antarctic Research (Auckland, Nueva Zelanda, 22 d'agostu a 3 de setiembre de 2014).
      Procesos xeomorfolóxicos en Punta Elefante (Isla Livingston, Antártida).
      XIII Xunta de la Sociedá Española de Xeomorfoloxía (Cáceres, España, 9-12 de setiembre de 2014).
      Geoecological dynamics in a ice-free area in the Maritime Antarctica: a study case from Elephant Point (Livingston Island, South Shetland).
      Ecology of Glacier Forelands (Obergurgl, Austria, 17-21 de setiembre de 2014
      Paraglacial processes in a recently deglaciated Antarctic environment (Elephant Point, Livingston Island).
      International Symposium on The Future of the Glaciers. From the past to the next 100 years (Turín, Italia, 18-21 de setiembre de 2014).

    Imaxes:

    Enllaces Rellacionaos:


Buscar