Noticias

  • Un congresu internacional de la Universidá d'Uviéu axunta a más de 100 espertos en sistemes dinámicos

    03 de Setiembre 2012

    Los sistemes dinámicos tienen aplicaciones na esplotación de recursos biolóxicos, la meteoroloxía, la esploración espacial, el control d'epidemies o los modelos financieros, ente otros ámbitos.

    Esti llunes, 3 de setiembre, inauguróse nel Hotel NH de Xixón el Congresu Internacional "Sistemes Dinámicos: 100 años dempués de Poincaré", qu'hasta'l vienres día 7 va axuntar n'Asturies a más de cien espertos nel campu de los sistemes dinámicos. Nel actu d'inauguración intervinieron la vicerrectora d'Investigación y Campus d'Excelencia Internacional de la Universidá d'Uviéu, Mª Paz Suárez Rendueles, y el presidente del comité organizador del Congresu, Santiago Ibáñez.

    Nel Congresu, entamáu pol Grupu de Sistemes Dinámicos de la Universidá d'Uviéu (Departamentu de Matemátiques), participen investigadores procedentes de distintos países europeos, lo mesmo que de Estaos Xuníos, China, Xapón, Brasil, México, etcétera, que mientres cinco díes van dar a conocer y van aldericar nuevos desenvolvimientos y perspectives alrodiu de los temes encetaos, cuantimás d'aquellos que guarden mayor relación colos problemes del mundu real.

    El Congresu celebrase con motivu del centenariu de la muerte del matemáticu y filósofu francés Henri Poincaré (1854-1912), unu de los más grandes matemáticos de la dómina moderna, pola so contribución a la solución de distintos problemes de la teoría de les funciones, les ecuaciones diferenciales y la mecánica celeste.

    La relevancia de los sistemes dinámicos, que tanto deben a Poincaré, nun se llinda a les matemátiques, sinón qu'algama a otres árees de la conocencia, como la física, la medicina, la química, la bioloxía y l'economía. Les sos aplicaciones inclúin la esplotación de recursos biolóxicos, la meteoroloxía, la esploración espacial, el control d'epidemies, la tresmisión d'información y los modelos financieros.


Buscar