Noticias

  • Santiago García Granda toma posesión como rector de la Universidá d'Uviéu

    16 de Mayu 2016

    Nel so discursu na Biblioteca Universitaria, defendió una xestión axilosa, moderna y activa, y aseguró qu'unu de los oxetivos va ser "faer una Universidá más tresparente, más dinámica y más cercana

    Toma de posesión del nuevu rector
    La Universidá d'Uviéu celebró esta tarde la investidura y toma de posesión de Santiago García Granda como Rector, nuna solemne ceremonia na Biblioteca Universitaria con cerca de 150 doctores revistíos, autoridaes polítiques –encabezaes pol presidente del Principáu, Javier Fernández-- y académiques, y representantes de tolos estamentos de la sociedá. García Granda, catedráticu de Química Física, sustitúi nel cargu al tamién químicu Vicente Gotor, que remata dos mandatos al mandu de la Universidá.
     
    El nuevu rector empecipió'l so discursu oficial n'asturianu pa faer una reconocencia a la so familia. García Granda abogó por caltener la química" ente la Universidá, la comunidá y la sociedá, daqué que definió como "gran y motivador retu". Pidió, amás, a les alministraciones públiques, a los axentes sociales y económicos y a los miembros de la comunidá universitaria la so ayuda pa "camudar la Universidá d'Uviéu".
     
    Indicó que "queremos faer una universidá más tresparente, más dinámica y más cercana", y tamién "axilosa, moderna y activa". Nesta mesma llínea aseguró que "vamos trabayar siempres pol interés xeneral, por una universidá pública y calidable, actuando dende la responsabilidá y con una alministración eficiente, tratando d'apigurar les aspiraciones lexítimes de la comunidá universitaria".
     
    García Granda tomó los atributos de rector –la medaya y el cayáu de mandu— de la mano de Vicente Gotor. El rector saliente dedicó'l so discursu de despidida a estimar a tolos universitarios, a les autoridaes rexonal y municipal, y a la sociedá'l compromisu qu'amosaron estos últimos ocho años con la Universidá d'Uviéu. Vicente Gotor ufiertó "tola mio collaboración" al nuevu rector nesti nuevu mandatu y aseguró dexar el rectoráu con "l'arguyu de trabayar pa la Universidá". Dedicó l'agradecimientu más especial a la so familia y recordó qu'agora torna al llaboratoriu y a la facultá de Química.
     
    Pela so parte, el presidente del Gobiernu asturianu, Javier Fernández, indicó que la Universidá d'Uviéu "supo evolucionar bien, y allo contribuyeron los socesivos equipos rectorales". Señaló tamién que dende'l Gobiernu rexonal va apurrise'l financiamientu necesariu acorde colo previsto nel marcu de financiamientu estable 2015-2018.
     
    El nuevu rector tuvo arropáu nel actu pol conseyeru d'Educación y Cultura, el presidente de la Xunta Xeneral del Principáu, el Delegáu del Gobiernu, l'alcalde d'Uviéu, el viceconseyeru de Cultura, el presidente del Conseyu Social y la directora xeneral d'Universidaes, ente otres munches autoridaes. Amás, asistieron a la ceremonia los exrectores y los miembros del equipu rectoral saliente. Tamién acompañaron al rector, los miembros del so nuevu equipu, vicerrectores y secretaria xeneral.
     

    Imaxes:


Buscar