Noticias

  • Rectoráu y estudiantes alcuerden les primeres midíes p'ameyorar la implantación del Plan Bolonia'

    05 de Abril 2011

    El rector comprometese colos decanos y representantes estudiantiles a arreglar los problemes qu'afecten a dellos centros por aciu el desdoble de grupos y la contratación de docentes.

    La docencia va tener preferencia frente a otros gastos
    Más profesores el próximu cursu pa desdoblar dellos grupos y amenorgar la masificación que los alumnos denuncien en delles clases. Ye'l principal compromisu del rector, Vicente Gotor, colos estudiantes y decanos de delles facultaes que celebraron una primer xunta pa buscar soluciones a los problemes causaos cola implantación del Espaciu Européu d'Educación Cimera (EEES). Los alumnos anunciaron que van cesar les movilizaciones en vista de que empezóse a trabayar con "unidá ente la institución académica y los estudiantes en defensa de la Universidá pública", según declaró unu de los voceros estudiantiles.

    El rector, Vicente Gotor , y el nuevu vicerrector d'Estudiantes y Empléu, Luis Rodríguez, caltuvieron un alcuentru de dos hores con una trentena de representantes estudiantiles, al que tamién allegaron los decanos de les facultaes de Derechu (Ramón Durán), Economía y Empresa (Manuel González), Formación del Profesoráu y Educación (Juan Carlos San Pedro), Psicoloxía (Marcelino Cuesta), Química (José Manuel Fernández Colinas), Filosofía y Lletres (Cristina Valdés); la vicedecana de Bioloxía (María del Carmen Fernández-Carvajal) y el director de la Escuela Politécnica d'Inxeniería de Xixón (Hilario López). La xunta ye frutu de la molición manifestada por representantes d'alumnos y miembros de l'Asamblea d'Estudiantes al respective de la puesta en marcha del Plan Bolonia.

    El rector informó de qu'a partir del próximu cursu nun va haber grupos con más de 100 alumnos. Vicente Gotor indicó que dende la Universidá fadrá un esfuerzu pa cuntar con más grupos y más profesores, ya incidió en tou momentu en que la docencia va tener preferencia frente a otros gastos. Na xunta nun hubo tiempu pa encetar la problemática de toles facultaes, polo que va tener continuidá la próxima selmana.

    Per parte de los estudiantes, actuaron como portavoz Santiago Fano y Rubén Rosón, que valoraron positivamente la posición de diálogu y los compromisos alcanzaos, magar recordaron qu'esisten otres demandes pindies, como'l nuevu réxime de permanencia que van intentar camudar nel marcu del Conseyu Social de la Universidá.


Buscar