Noticias

  • Profesores universitarios y de FP alderiquen sobre les víes de collaboración ente dambos sistemes

    28 de Febreru 2012

    Sol lema "Uniovi + FP = Σxperiencies. Fórmules pa sumar esfuerzos y multiplicar resultancies" esaminaron proyectos esitosos n'otres comunidaes.

    Imaxe de la Xornada

    Profesores de la Universidá d'Uviéu y de centros de Formación Profesional del Principáu tomaron parte esta mañana na xornada "Uniovi + FP = Σxperiencies. Fórmules pa sumar esfuerzos y multiplicar resultancies". El foru foi inauguráu esta mañana pol rector, Vicente Gotor, y la conseyera d'Educación y Universidaes, Ana Isabel Álvarez González.

    La xornada, entamada pol Vicerrectorado d'Estudiantes y Empléu col sofitu del Vicerrectorado del Campus d'Excelencia Internacional, incluyó ponencies y esposiciones nes que s'amosaron dalgunes de les víes de collaboración ente dambos sistemes que resultaron especialmente esitoses n'otres comunidaes.

    Los espertos aconceyaos na Aula Magna del Edificiu Polivalente del campus de Xixón tuvieron oportunidá d'aldericar y oldear idees pa estrechar la collaboración ente la Universidá y la FP. Na so intervención, el rector apostó precisamente per esa llínea de collaboración yá que "dambos sistemes tenemos la responsabilidá d'ufiertar la meyor formación posible a los nuesos estudiantes, que van formar la sociedá del futuru".

    Pela so parte, la conseyera d'Educación y Universidaes resaltó la importancia de que los alumnos de FP tengan la oportunidá de faer práctiques na Universidá y tener accesu a instalaciones y llaboratorios piqueros.

    La vicerrectora del Campus d'Excelencia Internacional Paz Suárez Rendueles foi la encargada de clausurar la cita poniendo de relieve que "la collaboración ente la Universidá y la Formación Profesional ye unu de los aspeutos que se trata de primar nel programa de Campus d'Excelencia Internacional y que se potenció ya incentivó nes convocatories del Subprograma de Fortalecimientu. Dimos los primeros pasos, pero quédanos entá enforma camín por percorrer", concluyó.


Buscar