Noticias

  • El Conseyu de Gobiernu de la Universidá aprueba'l presupuestu pa 2011

    21 de Xineru 2011

    La institución académica va cuntar con 218 millones d'euros, un 5% menos que l'añu anterior, pal presente exerciciu

    El rector, Vicente Gotor, y el vicerrector de Planificación Económica, Santiago Álvarez (esquierda)
    El Conseyu de Gobiernu de la Universidá d'Uviéu aprobó esta mañana'l presupuestu pal exerciciu 2011 por una cuantía de 218.000.747 euros. Esta cifra supon un amenorgamientu del 5,04% al respective de los presupuestos del exerciciu anterior. El rector, Vicente Gotor, y el vicerrector de Planificación Económica, Santiago Álvarez, esplicaron les principales novedaes de les cuentes pal presente añu, qu'inclúin una nueva sección presupuestaria pal Campus d'Excelencia Internacional.

    L'amenorgamientu del presupuestu, que'l pasáu añu xubió a 229.561.392 euros, débese principalmente a dos elementos. De primeres, pola difícil coxuntura económica qu'obliga a les alministraciones públiques a adoptar midíes de contención de gastu. Y de segundes, pol efectu que sobre los gastos de personal tuvo l'aplicación del decretu de mayu del pasáu añu pol que s'adopten midíes estraordinaries pal amenorgamientu del déficit públicu.

    Santiago Álvarez destacó l'importante esfuerzu realizáu p'afaer les necesidaes de gastu al retayu qu'esperimentaron los ingresos que la institución tien previstu recaldar a lo llargo del exerciciu. El vicerrector recordó qu'esiste un importante volume de gastos con financiamientu afectáu, como ye'l casu del dineru destináu al Campus d'Excelencia Internacional, qu'anguaño foi incluyíu ente les tresferencies procedentes del Gobiernu del Principáu. Nos presupuestos creóse una sección específica pal CEI col fin de "aumentar la so visibilidá y de facilitar la rindición de cuentes sobre l'aplicación de los recursos a los fines plantegaos nel proyectu escoyíu".

    Polo que se refier al presupuestu de gastos, el capítulu más importante ye'l correspondiente a gastos de personal, que xuben a 131.519.157 euros, lo que supon un amenorgamientu del 2,94% al respective de la cantidá primeramente presupuestada nel exerciciu anterior.

Buscar