Noticias

  • Premiáu un doctorandu de la Universidá d'Uviéu en dos alcuentros internacionales sobre física de partícules

    10 de Xunetu 2014

    El póster ellaboráu por Santiago Folgueras sintetiza la so investigación sobre la materia escuro y foi reconocíu nes últimos congresos celebraos en Nueva York y Valencia

    Póster ellaboráu por Santiago Folgueras.

    Dos de les xuntes internacionales más prestixoses n'investigación de física d'altes enerxíes reconocieron el trabayu d'un doctorandu de la Universidá d'Uviéu, Santiago Folgueras. El so poster tituláu Search for new physics using events with two same-signed isolated leptons in the sinal state at CMS foi premiáu na 37th International Conference on High Energy Physics (ICHEP) y na Large Hadron Collider Physics (LHCP) Conference, celebraos nes últimes selmanes en Valencia y na Universidá de Columbia en Nueva York.

    El póster distinguíu sintetiza la investigación desenvuelta sobre les partícules supersimétricas, que centren bona parte de los trabayos de la llamada nueva física pa intentar confirmar la esistencia de la materia escuro. La predicción sobre la que se basa l'estudiu de Santiago Folgueras trata de comprobar si esisten nueves partícules más allá del modelo estándar de la física de partícules actual.

    Folgueras prepara la so tesis doctoral col grupu d'investigación en Física esperimental d'Altes Enerxíes de la Universidá d'Uviéu, que lidera'l profesor Javier Cueves, y tamién collabora coles investigaciones del esperimentu CMS desenvueltes nel CERN. Los sos trabayos cunten yá con publicaciones en prestixoses revistes especializaes y fueron espuestos n'alcuentros científicos de máxima relevancia internacional.


Buscar