Noticias

  • Carlos López-Otín recueye'l premiu México de Ciencia y Tecnoloxía

    10 de Mayu 2012

    El presidente mexicanu, Felipe Calderón, empondera la trayectoria del catedráticu de la Universidá d'Uviéu, estremáu pola so trayectoria investigadora

    Carlos López-Otín na ceremonia d'entrega del galardón (imaxe de la galería fotográfica de la web de Presidencia de la República de México).

    El catedráticu en Bioquímica y Bioloxía Molecular de la Universidá d'Uviéu Carlos López-Otín acaba de recoyer el premiu México de Ciencia y Tecnoloxía 2011 de manos del presidente mexicanu, Felipe Calderón. López-Otín, estremáu pola so trayectoria investigadora, estimó a la Universidá d'Uviéu, promotora de la so candidatura, y a los sos colegues mexicanos el sofitu recibíu.

    Felipe Calderón destacó mientres la ceremonia d'entrega la trayectoria del investigador. "El so nome, doctor Carlos López-Otín, yá ta acomuñáu a les meyores más notables de la bioloxía molecular mundial", sorrayó'l mandatariu. Nacíu en Sabiñánigo (Huesca), López-Otín ye dende 1993 profesor de Bioquímica y Bioloxía Molecular de la Universidá d'Uviéu, onde desenvuelve'l so llabor investigador dende 1987. Calderón celebró'l llabor d'un científicu que "dio nueves lluces pal tratamientu del cáncer y nueves lluces pa prevenir o correxir l'avieyamientu prematuru". "Usté foi llargamente reconocíu en tol mundu yá pola orixinalidá y pol valor de les sos investigaciones, que dan nueves lluces pa desafíos y carecimientos del home, que son avasalladores inda pa cualesquier ser humanu", amestó'l presidente mexicanu.

    La candidatura de López-Otín foi escoyida pol Conseyu Nacional de Ciencia y Tecnoloxía de México (Conacyt) ente 40 científicos de Centroamérica, Suramérica, Caribe, España y Portugal. Ante representante del Conacyt, rectores y representantes d'instituciones como'l Colexu de México (Colmex), Calderón enfatizó que la llucha contra'l cáncer representa un gran retu pa la Humanidá, yá que en 2030 envalórase que 21 millones de persones carezan esta enfermedá.

    López-Otín, pela so parte, recordó unes palabres del poeta Ángel González: "Por que yo llámeme Ángel González, por que'l mio ser pese sobre'l suelu, foi necesariu un anchu espaciu y un llargu tiempu". Esos versos, señaló'l catedráticu, tamién valen pa él, quien recibió'l sofitu de los sos padres cuando vivía nel Pirinéu aragonés y dempués de grandes maestros" como la tamién esperta en bioloxía molecular Margarita Salas, que recibió este mesmu galardón en 1998. El científicu alvirtió de que na llucha contra les enfermedaes rellacionaes col avieyamientu "queda bien de por faer". Sicasí, precisó, parafrasiando al Nobel asturianu Severu Ochoa (1905-1993), que ye necesariu mirar al futuru "con enfotu".

    Imaxes:


Buscar