Noticias

  • Michael Haneke imparte una clase maxistral de cine na Universidá d'Uviéu

    24 de Ochobre 2013

    La Facultá de Filosofía y Lletres acoyó un alcuentru del Premio Príncipe d'Asturies de les Artes 2013 con estudiantes y mozos realizadores asturianos, nel qu'esplicó les claves del so llabor creativu

    Imaxe del alcuentru con Michael Haneke

    "Namá puede tase nesti oficiu cuando te encegola tantu que nun puedes faer otra cosa". Asina d'atayante amosóse Michael Haneke (Múnich, 1942) al referise a la so faceta como cineasta. El director austríaco d'orixe alemán, que cola so película Amor llogró un Oscar, la Palma d'Oru del Festival de Cannes y un Globu d'Oru desveló les claves del so trabayu ante un nuevu auditoriu qu'enllenó la Biblioteca d'Humanidaes.

    L'actu foi presentáu por vicerrector d'Estensión Universitaria y Comunicación, Vicente Domínguez, acompañáu pola profesora Margarita Blanco. Domínguez definió a Haneke como "unu de los grandes artistes del nuesu tiempu" y sorrayó l'honor que suponía la presencia del cineasta na Universidá d'Uviéu.

    El prestixosu director austríaco defende que "el cineasta tien que tomar en serio al espectador"

    El director de películes como Funny Games o Caxé, ente otros títulos de referencia, caltúvose fiel a la so determinación de nun revelar claves interpretatives de les sos películes, pero sí esplicó los sos puntos de vista sobre diversos temes rellacionaes cola so faceta de ceador, nun diálogu nel que participaron tanto mozos realizadores como estudiantes. Una de les primeres cuestiones plantegaes foi la responsabilidá de los cineastes y la so función social. "Esiste'l cine como forma d'espresión artística, que desempeña un papel intelectual, y depués el cine como negociu, que quiciabes supon el noventa y cinco per cientu. El problema ta en que la educación pasa al traviés del cine comercial", afirmó Haneke, pa quien "el cineasta tien que tomar en serio al espectador".

    Les obres de Haneke tán concebíes p'abrir "un espaciu d'interpretación pal espectador", per mediu d'hestories que dacuando nacen "d'una vivencia personal, y otres d'una idea o d'una escena". El prestixosu autor considera que l'ésitu de cualquier filme "depende d'un bon guión y de un casting fayadizu".

    Mientres el coloquiu tamién s'encetó la cuestión de la violencia, que ta bien presente na obra de Haneke, anque apaez "diariamente nos medios de comunicación, lo que fixo que el espectadores acostumar a ella". Como nel casu d'otres problemátiques, la intención de Haneke ye amosar la realidá y plantegar entrugues, ensin pronunciar opiniones polítiques o sociales al respective de la forma en qu'habríen d'encetase. "Nun soi políticu, nin trabayador social, nin una persona que quiera espublizar les sos idees sobre estes temes", aseguró. Lo que quixo dexar claro ye "el peligru potencial de convertir les idees n'ideoloxía, como traté d'amosar en La cinta blanca".

    Por cuenta de los Premios Príncipe d'Asturies, la Fundación qu'entama los galardones y l'Universidá d'Uviéu celebraron del 14 al 22 d'ochobre un cine fórum dedicáu al cineasta, que llevó'l so filmografía completa a Uviéu, Xixón y Avilés.


Buscar