Noticias

  • Más d'un 71% de los titulaos en másteres oficiales de la Universidá d'Uviéu llogra un empléu

    21 de Mayu 2015

    El primer estudiu de siguimientu de egresados nes trés últimes promociones realizáu pel Centru Internacional de Posgráu revela un altu prestu cola formación recibida y col so puestu de trabayu

    Les grandes empreses son el destín prioritariu de los titulaos, el 51 per cientu trabaya nuna compañía de más de 500 emplegaos.

    Un 71,6 per cientu de los alumnos egresados de máster universitariu tán trabayando dempués de concluyir los sos estudios y el 73 per cientu d'ellos reconocen que cursaríen el mesmu máster si tuvieren qu'escoyer de nuevu la so formación de posgráu. Estos son dalgunos de los datos que reflexa la encuesta de siguimientu de titulaos en másteres universitarios que'l Centru Internacional de Posgráu de la Universidá d'Uviéu realizó ente alumnos de les trés últimes promociones.

    La institución académica ufierta pal próximu cursu 2015-2016 un total de 50 másteres universitarios, que'l so plazu de preinscripción ta abiertu hasta'l próximu 8 de xunu. El catálogu inclúi programes internacionales, billingües y n'estrecha collaboración col mundu de la empresa.

    L'estudiu, ellaboráu dende la Unidá Técnica calidable, entrevistó a 437 estudiantes de 27 másteres universitarios, una amuesa que toma títulos de toles cañes de conocencia. El perfil demográficu del estudiante ye una muyer asturiana d'ente 20 y 30 años. El númberu d'alumnos estranxeros o d'otres provincies foi creciendo progresivamente nos últimos trés años hasta representar el pasáu cursu un terciu del total d'estudiantes matriculaos.

    Esta ye la primer ocasión en que se realiza un siguimientu de los egresados desque se fizo la renovación de la ufierta de posgráu p'afaela al Espaciu Européu d'Educación Cimera. Los titulaos respuenden por los nuevos programes de posgráu ufiertaos pola Universidá d'Uviéu, yá que casi la metá de los encuestaos, un 40 per cientu, asegura utilizar "bastante o enforma" la conocencia adquiría, a la de desempeñar el so actual empléu.

    L'estudiu de siguimientu de los egresados de máster oficial recueye tamién aspeutos sobre les condiciones llaborales. El 41 per cientu tien un contratu temporal y el 25 per cientu, indefiníu. Les grandes empreses son el destín prioritariu de los titulaos, el 51 per cientu trabaya nuna compañía de más de 500 emplegaos. Cabo reseñar la medría del porcentaxe d'entamadores, que pasó d'un 4 per cientu en 2011 a un 12 per cientu en 2014. La encuesta revela tamién que cerca d'un 70 per cientu asegura tar "bastante o bien satisfechu" col so puestu llaboral.


Buscar