Noticias

  • Más de 24.500 universitarios tán convocaos a les elecciones al claustru de la Universidá d'Uviéu

    28 de Setiembre 2016

    La presentación de candidatures va tener llugar ente'l 13 y el 19 d'ochobre y la votación pa escoyer a los 300 claustrales va celebrase'l 15 de noviembre

    Un total de 24.522 universitarios, según el censu provisional, tán convocaos a les elecciones al claustru de la Universidá d'Uviéu que se van celebrar el 15 de noviembre. La presentación de candidatures va tener llugar los díes 13, 14, 17, 18 y 19 d'ochobre, y la campaña electoral va tar abierta dende'l 31 d'ochobre hasta'l 11 de noviembre.
     
    El Claustru ye'l máximu órganu de representación de la comunidá universitaria (artículu 47.1 de los Estatutos de la Universidá d'Uviéu). Ta formáu pol rector, la secretaria xeneral, el xerente y trescientos miembros escoyíos d'ente los distintos sectores de la comunidá universitaria. Les elecciones al claustru convoquen cada cuatro año y la so xunta ordinaria en plenu celébrase, siquier, una vegada al añu.
     
    Correspuende al Claustru la reforma total o parcial de los estatutos de la Universidá, conocer les sos llínees xenerales d'actuación, proponer iniciatives al Conseyu de Gobiernu, aldericar l'informe añal sobre la institución presentáu pol rector, escoyer al defensor universitariu, y convocar elecciones estraordinaries a rector, ente otres competencies.
     
    Por colectivu, el claustru ta compuestu por 165 representantes del sector A, profesores doctores con vinculación permanente; 30 representantes del sector B, integráu pol restu del personal docente ya investigador (12 representantes del colectivu B1, profesores con vinculación permanente funcionarios non doctores; 13 representantes del colectivu B2, personal docente ya investigador ensin vinculación permanente a tiempu completu; y 5 representantes del colectivu B3, personal docente ya investigador ensin vinculación permanente a tiempu parcial); 75 representantes del Sector C, integráu por estudiantes (72 estudiantes de grau o master o de primeru y segundu ciclu, y 3 representantes d'estudiantes de doctoráu y tercer ciclu); y, finalmente, 30 representantes del sector D, correspondiente al personal d'alministración y servicios.

Buscar