Noticias

  • Mafalda entra na Universidá d'Uviéu con una esposición de viñetes y un taller de sopes

    22 de Ochobre 2014

    Quino, Premio Príncipe d'Asturies de Comunicación y Humanidaes, inaugura l'amuesa nel Centru Cultural LAUDEO y prueba una de les recetes preparaes por cocineros de l'Asociación de Restoranes de Fomentu de la Cocina Asturiana

    Quino al pie de los cocineros qu'ellaboraron les sopes pa Mafalda nel patiu de LAUDEO.

    La Universidá d'Uviéu abrió les sos puertes a Mafalda, l'emblemáticu personaxe de Joaquín Salvador Llaváu, Quino, por cuenta de la concesión del Premio Príncipe d'Asturies de Comunicación y Humanidaes. Quino foi l'encargáu d'inaugurar una esposición y percorrer un taller de sopes ellaboraes por restauradores asturianos que pudieron tastiar cientos de persones nel patiu del Centru Cultural LAUDEO, nel Edificiu Históricu de la institución académica.

    Acompañáu pol rector, Vicente Gotor; el vicerrector d'Estensión Universitaria y Comunicación, Vicente Domínguez; y la directora de la Fundación Príncipe d'Asturies, Teresa Sanjurjo, Quino percorrió l'amuesa qu'inclúi dalgunes de les viñetes más famoses nos 50 años d'hestoria de Mafalda. La esposición Quino por Mafalda va tar abierta al públicu nel Claustru de LAUDEO hasta'l 29 de noviembre.

    Una vegada nel patiu del Edificiu Históricu, el Premiu Príncipe d'Asturies pudo probar una de les de recetes de sopa ellaboraes pa la ocasión por cinco cocineros de la  Asociación de Restoranes de Fomentu de la Cocina Asturiana qu'asumieron el retu de preparar un platu que pudiera gusta-y a Mafalda. El taller de sopes partió 500 raciones de cada sopa al numberosu públicu qu'allegó a la cita pa homenaxar a Quino y al so popular personaxe.

    El menú de sopes foi escurríu polos once componentes de l'asociación: Laura Antón (La Goleta), Javier Antón (Casa Conrado), Elías Fernández (Palaciu de les Nieves), Miguel Loya (Balneariu de Salinas), Javier Loya (Deloya), Luis A. Martínez (Casa Fermín), Pedro morán (Casa Gerardo), Roberto Riginelli (La Pondala), Juan Rivero (Casa Tataguyo), Rodrigo Raspia (La Tabierna del Zurdu), Juan R. Sánchez (Del Arcu) y Abel Terente (L'Asador d'Abel). Anque finalmente, fueron cinco los cocineros que punxeron sobre los fogones l'encargu, nuna idea qu'el mesmu Quino valoró como "orixinal, simpática y cariñosa.  Allégrome de crear ensin querelo una cosa tan llinda".

    Imaxes:


Buscar