Noticias

  • Los Campus Científicos de Branu completen satisfactoriamente la so edición de 2011

    05 de Agostu 2011

    Un proyectu nel que participaron 60 mozos de too el país, atendíos por un equipu qu'apiguró a mediu centenar de collaboradores de la Universidá y otres entidaes.

    Probando un sismógrafu (Xeoloxía)

    ¿Puede averase a mozos futuros universitarios- a la ciencia y l'investigación dende una perspectiva vacacional? Esi ye'l retu, superáu una vegada más con ésitu, de los Campus Científicos de Branu que na so edición de 2011 rexuntó a 60 mozos estudiantes de bachilleratu, veníos de toa España pa participar nuna esperiencia única.

    Distribuyios en cuatro proyectos d'acercamientu científicu: "L'home y la tierra: Escuela de Xeoloxía", "Bases Científiques de les Investigaciones Criminalístiques (CSI)", "La Inxeniería Electrónica na vida cotidiana" y "El llinguaxe de les Célules".

    El cursu dedicáu a la Xeoloxía tomó dende reconocencia de roques ya interpretación de paisaxes, a los secretos de terremotos, tsunamis y volcanes, pasando pol montaxe d'una estación sísmica o la escursión a la contorna de la Babia.

    La Criminalística y tol so arsenal de recursos d'investigación basaos n'otres ciencies (Física, Química, Bioloxía, Matemátiques…) dieron pie a entreteníes práctiques con sabor a investigación detectivesca.

    El papel de la tecnoloxía nes nueses vides foi'l filo conductor del cursu dedicáu a la Inxeniería Electrónica, con aplicaciones que tomaron dende los usos na industria, la educación y l'ociu hasta la sanidá o los sistemes de comunicación más modernos.

    Les nueves tecnoloxíes y les sos ferramientes tamién tuvieron protagonismu nel cursu "El llinguaxe de les célules", nel que, amás de repasar conceutos básicos sobre morfoloxía y bioloxía celular, los cursillistas pudieron esperimentar con equipamientos d'alta tecnoloxía emplegaos nesi campu.

    Como complementu a la participación en los proyectos d'acercamientu científicu, completaron la so formación col aprendizaxe de técniques y habilidaes de divulgación y comunicación de la ciencia que-yos resultaron d'utilidá pa la ellaboración del proyectu final y la presentación pública de resultancies. Amás, participaron nuna serie de visites d'ociu, culturales y deportives, p'arriquecer la esperiencia.

    Los medios de comunicación asturianos fixéronse ecu a esgaya d'una iniciativa que punxo en contactu a los sos participantes cola investigación, el desenvolvimientu y l'innovación, según con otros aspeutos que formen parte de la filosofía del Campus d'Excelencia Internacional de la Universidá d'Uviéu, como la internacionalización y la interculturalidad; la enseñanza d'habilidaes tresversales -comunicación, accesu a nueves tecnoloxíes, igualdá de xéneru, la relación cola empresa- y el fomentu polo xeneral de la cultura y del patrimoniu histórico y natural d'un territoriu como l'asturianu.

    Imaxes:

    Enllaces Rellacionaos:


Buscar